Свята Узвышэння Святога Крыжа, якое ў паўсюдным Касцёле адзначаецца 14 верасня, сёлета для мінскага кальварыйскага касцёла было асаблівым. Святыня, якая ў 1842 годзе была асвечаная пад тытулам менавіта гэтай вялікай падзеі, перажыўшы тры вайны, у 1980 годзе, гэта значыць 45 год таму, стала першай святыняй, адкрытай у Мінску ў савецкі час. Для многіх мінскіх каталіцкіх вернікаў яна доўгі час заставалася адзінай калыскай жыцця і веры.