Заклік Мітрапаліта Мінска-Магілёўскага арцыбіскупа Юзафа Станеўскага, Старшыні Канферэнцыі Каталіцкіх Біскупаў Беларусі, да малітвы за дабрадзеяў
«Шчаслівыя міласэрныя, бо яны спазнаюць міласэрнасць» (Мц 5, 7).
Дарагія браты і сёстры!
Многія з нас знаёмыя з існаваннем і дзейнасцю «Рады дапамогі Касцёлу на Усходзе» — гэта арганізацыя, што складаецца з людзей- дабрадзеяў. Большасць з іх застаюцца невядомымі, згодна з евангельскім прынцыпам Езуса: «Калі даеш міласціну, не трубі перад сабою» (Мц 6, 2). Нам жа, людзям, якія атрымліваюць тую ці іншую дапамогу, варта кіравацца словамі святога апостала Паўла, які ў Першым Пасланні да Тэсаланікійцаў заахвочвае вернікаў гэтай супольнасці: «За ўсё дзякуйце» (1 Тэс 5, 18).
Такім чынам, у якасці выразу нашай глыбокай удзячнасці і сувязі з дабрадзеямі заахвочваю вас, дарагія святары і манаскія асобы, вернікі і тыя, хто адчуў дотык дапамогі, да малітвы за дабрадзеяў 7 снежня ў ІІ Нядзелю Адвэнту.
Найпрыгажэйшым спосабам падзякі з’яўляецца цэлебрацыя святой Эўхарыстыі: Эўхарыстыя азначае падзяку.
Браты і сёстры, аб’яднайма нашы малітвы не толькі з тымі, хто нам дапамагае, але і з тымі нашымі братамі і сёстрамі, якія маюць патрэбу ў нашай дапамозе. Асаблівым чынам хочацца папрасіць аб малітве за састарэлых і самотных дабрачынцаў, якія часта могуць даць толькі «лепту ўдавы», але чыя вернасць і любоў з’яўляюцца сапраўдным адлюстраваннем евангельскай парады.
Няхай «Дзень дабрадзеяў» будзе вялікім святам удзячнасці, каб мы яшчэ больш нараджаліся і ядналіся ў любові Сэрца Езуса ў адзіную Божую сям’ю.
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў Беларусі
Мінск, 4 снежня 2025 г., Літургічны ўспамін святой Барбары.
