Плён Юбілейнага года ў Беларусі: хор «Пілігрымы надзеі»

2 снежня, 2025
Тэкст і фота: удзельнікі хору // Catholicminsk.by

Новы музычны праект пад назвай, аналагічнай дэвізу Юбілейнага года, сабраў каля 30 музыкаў з розных парафій.

Хор «Пілігрымы надзеі» аб’яднаў удзельнікаў зусім нядаўна, але яго гісторыя распачалася яшчэ 4 гады таму.

Менавіта ў 2022 годзе адбыліся першыя сустрэчы хору: удзельнікі рыхтаваліся да служэння спевам падчас святых Імшаў у пілігрымцы Мінск-Будслаў.

Ішлі гады, а пілігрымкавы хор зноў збіраўся ў капліцы святога Яна Евангеліста і святога Максіміліяна Марыі Кольбэ на вул. Матусевіча ў Мінску. Ужо «як звычайна» за месяц да падарожжа ў Будслаў праходзілі рэпетыцыі, дзе харысты вучыліся новым спевам і прыгадвалі вядомыя.

Найбольш адметным стала служэнне падчас святой Імшы для пілігрымаў у 2025 годзе каля абраза Маці Божай у Будславе. Гэта быў вялікі гонар і бачны плён сустрэч і працы на працягу чатырох год.

«Ідэя запісаць наш музычны матэрыял з’явілася нечакана, але веру, што гэта было сапраўдным натхненнем ад Бога. Таксама і назва амаль адразу лягла на сэрца. Гэта не проста хор. Гэта людзі, аб’яднаныя супольнай справай з гарачым сэрцам, гатовыя несці надзею і святло іншым праз свой талент»,

— дзеліцца Алёна Кот, лідарка і дырыжорка хору.