Слова арцыбіскупа Тадэвуша Кандрусевіча на Адвэнт 2025 года

Тэкст Слова для друку ТУТ>>>

Глыбокапаважаныя браты і сёстры!

1. Сёння першая нядзеля Адвэнту. Пад канец Юбілейнага года 2025, які мы перажываем пад дэвізам «Пілігрымы надзеі», Каталіцкі Касцёл распачынае новы літургічны год.

Адвэнт, як час падрыхтоўкі да святаў Божага Нараджэння і да другога прыйсця Хрыста ў славе, таксама з’яўляецца часам надзеі. Бог, які нас стварыў і прыйшоў да нас у вобразе чалавека праз Уцелаўленне свайго Сына, каб нас збавіць, прыйдзе ізноў у славе.

Папа Францішак кажа, што наш Бог прыходзіць, каб ажыццявіць нашыя асабістыя і калектыўныя гісторыі, нашыя разбураныя надзеі і жаданні (https://www.vatican.va/content/francesco/en/homilies/2015/documents/papa- francesco_20151129_repcentrafricana-omelia-cattedrale-bangui.html). 

Ён прыходзіць, каб выратаваць нас, бо калі не прыйдзе, то мы будзем цалкам бездапаможнымі, як драматычна сцвярджае святы Максім Вызнаўца (пар. https://dublindiocese.ie/pastoral-letter-for-advent-from-archbishop-dermot-farrell/).

2. У Адвэнце мы абвяшчаем і святкуем нашу надзею і веру ў тое, што наш Бог верны сваім абяцанням.

Пры гэтым трэба памятаць, што хрысціянская надзея не наіўная. Яна не спараджае настальгіі. Хутчэй, яна рэалістычная ў сваёй вернасці і смелая ў сваёй фантазіі. Надзея здольная ўбачыць заўтрашні дзень і таму з’яўляецца брамай у будучыню.

3.  Рыхтуючыся да святкавання дару бязмежнай Божай любові, якім стала Уцелаўленне Сына Божага, Адвэнт запрашае нас не толькі да падрыхтоўкі да гэтага свята, але і да ўспрыняцця любові Бога, адзін аднаго і ўсяго чалавецтва гэтак жа моцна, як нас любіць наш Створца.

У Евангеллі першай нядзелі Адвэнту Езус заклікае нас да чування, бо не ведаем у які дзень наш Пан прыйдзе (пар. Мц 24, 42). Езус таксама заклікае да малітвы (пар. 1 Тэс 5, 17) і навяртання (пар. Мк 1, 15). Гэта азначае, што чуванне, малітва і навяртанне з’яўляюцца асновай хрысціянскага жыцця.

Яны заклікаюць нас маліцца аб духоўнай сіле, каб перамагчы ўсе выпрабаванні. Заклікаюць чуваць перад спакусамі злога духа, каб ім не паддацца. Заклікаюць навяртацца, каб з упэўненасцю стаць перад Сынам Чалавечым, Які прыйдзе як злодзей ў невядомы час (пар. Мц 24, 43-44).

Мы перажываем вельмі складаны час, напоўнены рознымі праблемамі і крызісамі, у тым і духоўнымі. Сутыкаемся з небяспечнымі выклікамі, перш за ўсё па прычыне таго, што сучасная дамінуючая свецкая культура далёкая ад веры. Яна ўсё больш канцэнтруецца на дастасаванні веры да сучасных секулярных ідэалогій, а не на абароне вучэння Евангелля і жыцця паводле яго. Такім чынам, сучасная культура прадстаўляе сабой пазбаўлены вучэння Хрыста гуманізм. 

Нягледзячы на гэта, мы пакліканыя несці Добрую навіну ўсяму свету і суправаджаць тых, хто знаходзіцца на шляху да сустрэчы з Хрыстом. Перад абліччам небяспечных выклікаў, мы павінны заставацца поўнымі надзеі, бо тады нашае чаканне радасці Божага Нараджэння будзе большым, чым крызіс, які мы перажываем.

4. У Адвэнце мы павінны браць прыклад з Найсвяцейшай Панны Марыі. Яе «так» Богу дазволіла рэалізаваць Яго план збаўлення чалавецтва.

А як наконт нашага «так» Богу? Ці слухаем Яго і кланяемся Яму? А можа, пакланяемся «бажкам» гэтага свету, якімі з’яўляюцца матэрыяльныя каштоўнасці, прыемнасці, амаральныя задавальненні, алкаголь, наркотыкі, інтэрнэт-залежнасць, азартныя гульні і да т.п. 

На самой справе яны прапагандуюць толькі ілюзорнае, а не рэальнае шчасце, да якого мы імкнёмся. Таму мы не можам ашукваць сябе, падмяняючы сапраўднае шчасце сурагатным.

На гэтую праблему звярнуў увагу папа Леў XIV пачас Юбілею моладзі, калі сказаў, што ў нашых сэрцах крыецца пытанне пра праўду, якога нельга ігнараваць (пар. https://www.vatican.va/content/leo-xiv/en/homilies/2025/ documents/20250803-omelia-giubileo-giovani.html).

Таму нашай надзеяй перадусім павінен быць Бог, які ў сваім Уцелаўлёным Сыне прыйшоў да нас у Бэтлееме і зноў прыходзіць у сваім слове, каб нам абвяшчаць нязменную праўду Евангелля. Прыходзіць у сакрамэнтах, каб нас узбагаціць Божай ласкай і гэтым самым выратаваць, ацаліць, суцешыць і быць з намі, бо паклікаў нас да жыцця, а не да смерці. Прыходзіць у дабрачыннасці і іншай пастырскай дзейнасці.

5. Каб гэта надзея ажыццявілася, мы павінны выкарыстаць магчымасці, якія Касцёл нам прапануе ў Адвэнце. Гэта перадусім удзел у традыцыйных раратах, калі разам з Марыяй разважаем над таямніцай Уцелаўлення Сына Божага. Дзякуючы ёй, рассеялася цемра граху і ўзышло сонца справялівасці і Божай ласкі, якое не заходзіць. Гэта адвэнтавыя рэкалекцыі, які дапамагаюць нам пераглядзець стан нашай душы з мэтай яго ўдасканалення. Гэта пакаянныя набажэнствы, калі ў сакрамэнце паяднання мы атрымліваем ключ да неба. Гэта таксама іншыя пастырскія і дабрачынныя акцыі, на што звяртае ўвагу папа Леў XIV у Апостальскай адгартацыі Dilexi te — «Палюбіў цябе» (пар. Dilexi te, 115-121).

6. Адзін кіроўца аўтамабіля атрымаў узнагароду за тое, што праехаў мільён кіламетраў без ніводнай аварыі. Калі яго спыталі, як яму гэта ўдалося, ён даў просты адказ: «Глядзеў на дарогу». 

У сённяшнім Евангеллі Езус дае такую ж параду: «Глядзіце на жыццёвцю дарогу». Гэта не толькі добрая духоўная парада на перыяд Адвэнту, але і правіла для штодзённага жыцця. 

7. Старажытныя рымляне маліліся да бога Януса, які меў два твары. Адзін глядзеў у напрамку мінулага года, а другі — у напрамку надыходзячага. Таксама і мы падчас Адвэнту павінны глядзець на мінулую падзею першага прыйсця Езуса ў свет і з надзеяй чакаць другога Яго прыйсця ў славе.

Добрая навіна Адвэнту ў тым, што мы ўсе пакліканыя быць пільнымі, гатовымі і падрыхтаванымі, каб не абыякава і пасіўна, але актыўна з нецярпеннем чакаць Хрыста, які прыходзіць.

Марыя, узор малітвы і адвэнтавага чування, дапамажы нам у гэтым новым падарожжы надзеі!

З малітвай і благаслаўленнем на плённае перажыванне Адвэнту

✠ Тадэвуш Кандрусевіч
Мінска-Магілёўскі арцыбіскуп эмэрыт

Мінск, 23 лістапада 2025 г.
Урачыстасць Пана нашага Езуса Хрыста, Валадара Сусвету

Выкарыстаная літаратура:

1. Леў XIV. Энцыкліка Dilexi te.
2. https://www.vatican.va/content/francesco/en/homilies/2015/documents/papa-francesco_20151129_repcentrafricana-omelia-cattedrale-bangui.html. 
3. https://dublindiocese.ie/pastoral-letter-for-advent-from-archbishop-dermot-farrell/.
4. https://www.vatican.va/content/leo-xiv/en/homilies/2025/ documents/20250803-omelia-giubileo-giovani.html.