Святар з Мінска-Магілёўскай архідыяцэзіі і «Мужчыны Святога Юзафа» аднавілі прыдарожны крыж на Гродзеншчыне
- 21 ліпеня, 2026
У панядзелак 20 ліпеня ў парафію Звеставання Найсвяцейшай Панне Марыі ў Міжэрычах (Гродзенская дыяцэзiя, Слонімскі дэканат) прыехала група «Мужчыны Святога Юзафа» на чале з ксяндзом Генрыхам Кучынскім, пробашчам парафій святога Антонія ў Мар’інай Горцы і святых Пятра і Паўла ў Рудзенску. Для святара парафія Міжэрычы з’яўляецца роднай.
Мэта прыезду:
- паставіць новую агароджу вакол каталіцкага крыжа пры ўездзе ў вёску Пузікі,
- памаляваць крыж,
- зрэзаць галлё з дрэў,
- акультурыць прылеглую тэрыторыю вакол крыжа, каб кожны, хто праходзіць міма, мог спыніцца і ўшанаваць малітвай Езуса Хрыста, распятага на крыжы.
Варта адзначыць, што каля 30 гадоў таму гэты каталіцкі крыж ўстанаўліваў тата ксяндза Генрыха Тадэвуш Кучынскі разам са сваім сынам і блізкім сябрам — католікам Аляксандрам Акуневічам.
Усе запланаваныя працы былі выкананы.
