ЛІСТЫ ЧЫТАЧОЎ: Дзеці з Мар’інай Горкі зладзілі каляднае выступленне для пастаяльцаў мясцовага дома-інтэрната

Больш за 2000 год таму ў далекім горадзе Бэтлееме, ў халоднай пячоры нарадзілася Дзіцятка – Збаўца Свету, Цар Усіх Цароў. І далі імя Яму – Езус.

Не ў залатую калыску паклала яго Маці, а ў простыя яслі. Сваім Уцелаўленнем Збавіцель выказаў нам непамерную любоў Бога да ўсіх людзей. І кожны год, адзначаючы Свята Нараджэння Езуса Хрыста, мы самі прыкладаем намаганні, каб падзяліцца з нашым асяроддзем пяшчотай, дабрыней, верай і любоўю, асабліва з людзьмі хворымі, адзінокімі і церпячымі.

Так і зрабілі дзеткі з касцёла Святога Антонія Падуанскага ў Мар’інай Горцы. У нядзелю 29 снежня разам з настаяцелем кс. Генрыхам Кучынскім яны здзейснілі  вандроўку з каляднай пастаноўкай  у дом-інтэрнат “Семейный очаг”, што знаходзіцца ў вёсцы Новы Уборак Пухавіцкага раёна.

Стала ўжо добрай традыцыяй, што адзінаццаты год запар каталіцкі дзіцячы гурт “Пухавіцкія Пярлінкі” прыязджае сюды са сваімі каляднымі спектаклямі і спевамі, дорачы пастаяльцам радасць і дабрыню, цеплыню і ўсмешкі. А гледачы заўседы з хваляваннем чакаюць малых артыстаў, потым з задавальненнем удзельнічаюць у імпрэзе і доўга пляскаюць у далоні.

І ў гэтым годзе гадзіннае прадстаўленне са спеваў, гульняў і танцаў праляцела вельмі хутка. Найбольшую цікавасць у гледачоў выклікала гульня ў папяровыя снежкі, якую зладзілі маладыя артысты. Гледачы ж не толькі даведаліся з калядак пра гісторыю Нараджэння, але і спявалі, і танчылі разам з малымі артыстамі, а напрыканцы атрымалі салодкія пачастункі.

У зале панавала вельмі цеплая, радасная, лагодная атмасфера. Дзеці падзяліліся любоўю сваіх сэрцаў і яшчэ раз расказалі аб тым, што Бог – ёсць Любоў; што Бог любіць кожнага чалавека  незалежна ад стану яго здароўя, знешняга выгляду, нацыянальнасці, альбо мовы. Бог любіць бязмежна і ніколі не пакіне і не падмане. Выступленне скончылася гучнымі апладысментамі і запрашэннем прыехаць у наступным годзе.