Ва ўрачыстасць святога Юзафа ў Мінску адбылася святая Імша з нагоды імянін арцыбіскупа Станеўскага

19 сакавіка

20 сакавіка, 2026
Catholicminsk.by

19 сакавіка, калі Паўсюдны Касцёл успамінае святога Юзафа, Абранніка Найсвяцейшай Панны Марыі, у мінскім архікатэдральным касцёле маліліся ў інтэнцыі арцыбіскупа Юзафа Станеўскага, Мітрапаліта Мінска-Магілёўскага, у дзень яго імянін. Цэлебрацыю святой Імшы ўзначаліў сам дастойны імяніннік.

У цэлебрацыі прынялі ўдзел арцыбіскуп эмэрыт Мінска-Магілёўскі Тадэвуш Кандрусевіч, Генеральны вікарый Мінска-Магілёўскай архідыяцэзіі біскуп Юрый Касабуцкі, Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB, Апостальскі адміністратар для грэка-католікаў у Беларусі Сяргей Гаек, дзясяткі святароў, а таксама шматлікія вернікі.

На пачатку святой Імшы, якая распачалася спевам у гонар святога Юзафа, галоўны цэлебрант прывітаў усіх прысутных, у тым ліку прадстаўнікоў Віцебскай дыяцэзіі. Апекуну дня арцыпастыр даверыў Касцёл у Беларусі і ўсіх тых, хто яшчэ не наблізіўся да Бога.

Гамілію да прысутных прамовіў біскуп Юрый Касабуцкі. У ёй іерарх засяродзіўся на асобе святога Юзафа, адзначыўшы, што Евангеллі даюць вельмі скупыя звесткі пра Абранніка Найсвяцейшай Панны Марыі.

«Маўклівы святы», які не прамовіў ніводнага слова на старонках Святога Пісання, адыграў, аднак, важную ролю ў гісторыі збаўлення.

Паводле біскупа Юрыя, беднасць звестак з Евангелля пра святога Юзафа часта выклікала зварот да апакрыфічных крыніц, якія знайшлі адлюстраванне таксама ў сакральным мастацтве і архітэктуры. Іерарх распавёў пра цікавы прыклад мазаікі ў невялікім касцёле ў Стамбуле, даўнейшым Канстанцінопалі, дзе адлюстраваны посах Юзафа, які расцвіў, калі бацькі Марыі выбіралі ёй нарачонага сярод многіх кандыдатаў. Гэта было знакам ад Бога, што Юзафу прызначана асаблівая місія — стаць апекуном Святой Сям’і.

«Юзаф быў справядлівым веруючым, але звычайным чалавекам, якому складана было ўспрымаць Божыя знакі. Аднак ён даверыў гэтую справу Пану Богу, — адзначыў біскуп Юрый. — Моцная вера, справядлівасць, самаахвярнасць — галоўныя цноты святога Юзафа».

«Мы молімся, каб у нашым жыцці мы станавіліся падобнымі да Юзафа: мелі ахвярную любоў да іншага чалавека, якая не шукае сваёй выгоды, прыемнасці і камфорту»,

— рэзюмаваў іерарх.

Прамоўца таксама адзначыў, што святы Юзаф з’яўляецца не толькі апекуном Каталіцкага Касцёла, але і асаблівым апекуном арцыбіскупа Юзафа Станеўскага. Прамоўца правёў паралелі паміж перыпетыямі лёсу святога і біяграфіяй арцыпастыра: гэтак жа, як святы Юзаф, арцыбіскуп пяць гадоў таму прыняў волю Святога Айца Францішка ўзяць апеку над сям’ёй вернікаў Мінска-Магілёўскай архідыяцэзіі. Таксама яму, як святому Юзафу, даводзіцца прымаць адказныя і няпростыя рашэнні для дабра гэтай сям’і.

«Імя Юзаф азначае “Бог дадае, памнажае”, і, як у выпадку з апекуном Святой Сям’і, Бог дадае арцыпастыру сваёй ласкі, мудрасці і адвагі. Як і святы, арцыбіскуп — чалавек моцнай веры, справядлівы, міласэрны. І што самае цікавае, як адзін з персанажаў Старога Запавету, арцыбіскуп часта падкрэслівае: “Я — Юзаф, ваш брат, і іду разам з вамі”»,

— адзначыў біскуп Касабуцкі і выказаў Мітрапаліту Мінска-Магілёўскаму найлепшыя пажаданні з нагоды імянін.

Напрыканцы святой Імшы словы падзякі і віншаванняў прамовілі таксама арцыбіскуп эмэрыт Тадэвуш Кандрусевіч — ад імя Канферэнцыі Каталіцкіх Біскупаў Беларусі, архімандрыт Сяргей Гаек — ад імя грэка-каталіцкай супольнасці, і кусташ Кустодыі Ордэна Меншых Братоў Капуцынаў у Беларусі брат Алег Шэнда OFMCap — ад імя кансэкраваных асобаў Беларусі.