Урачыстасць святых Пятра і Паўла разам з Мітрапалітам адзначылі ў 4-х парафіях Мінска-Магілёўскай архідыяцэзіі

29 чэрвеня

1 ліпеня, 2025
Тэкст: арцыбіскуп Юзаф Станеўскі / Фота: з архіва парафіі св. Пятра і Паўла ў Клецку // Catholicminsk.by

Нядзеля 29 чэрвеня для Мітрапаліта Мінска-Магілёўскага арцыбіскупа Юзафа Станеўскага выдалася надзвычай плённай на паездкі і сустрэчы з вернікамі.

У дзень урачыстасці святых апосталаў Пятра і Паўла іерарх разам са сваім сакратаром ксяндзом канонікам Юрыем Ясевічам прыбылі ў парафію святых Апосталаў Пятра і Паўла ў горадзе Капыль. Пробашч парафіі ксёндз магістр Андрэй Калядка, які ад 2018 года разам з мясцовымі вернікамі апякуецца новапабудаваным касцёлам, размешчаным на прыгожым узгорку, ужо даўно запрашаў Мітрапаліта, каб разам з вернікамі ва ўрачыстасць нябесных заступнікаў паказаць адзінства і значнасць кожнай парафіі і кожнага верніка ў паўсюдным Касцёле. Гэта было таксама добрай нагодай, каб павіншаваць ксяндза Андрэя з днём яго нараджэння, які ён нядаўна адзначыў. Вернікі цёпла прывіталі арцыпастыра і распавялі яму гісторыю сваёй парафіі, а гэта значыць і гісторыю сваёй сям’і, бо парафія, як і дзяржава, — гэта сям’я сем’яў.

Затым арцыбіскуп Станеўскі наведаў парафію святой Барбары ў Замосці Слуцкага раёна, дзе душпастырскую апеку ажыццяўляе ксёндз Андрэй. Там каля старадаўняга касцёла знаходзіцца помнік воінам Другой сусветнай вайны з табліцамі імёнаў тых, што загінулі ў абароне Айчыны. На гэтым месцы Мітрапаліт разам з пробашчам і вернікамі памаліліся і склалі кветкі ў знак памяці і ўдзячнасці сваім папярэднікам за мірнае неба. Святая Імша і малітва падзякі ў касцёле закончыла наведванне парафіі ў Замосці. Неабходна было, своечасова пераадолеўшы трасу Мінск-Слуцк, трапіць ў наступную парафію, якая знаходзіцца пад духоўнай апекай ксяндза Андрэя.

Вернікі парафіі святой Ганны ў вёсцы Ленькі Слуцкага раёна збіраюцца на малітву ў новапабудаванай святыні. Тут з 90-ых гадоў мінулага стагоддзя існуе невялікая святыня якую пабудавалі парафіяне як «Дом сумеснага прабывання з Панам і перад Богам».

Узрушанню вернікаў не было канца. Сярод старэйшага пакалення, нібы кветкі на лузе, можна было заўважыць і маладых людзей, і дзяцей, якія віталі арцыпастыра годна, без боязі.

Святая Імша распачалася тут ад кароткай гісторыі парафіі, якую распавяла найстарэйшая парафіянка Яніна, якая была ля вытокаў будавання святыні. Гэтым разам час на малітву і размовы з пастырам былі моцна абмежаваныя. Гасцей чакалі вернікі ў наступнай парафіі.

Дакладна а 15-й гадзіне арцыбіскуп Станеўскі разам з тымі, хто яму спадарожнічаў, прыбыў у парафію Нараджэння святога Яна Хрысціцеля ў вёсцы Вынішчы Слуцкага раёна Нясвіжскага дэканату. І тут таксама пробашчам з’яўляецца ксёндз Андрэй Калядка.

Гэтым разам вернікі сусткалалі іерарха не толькі хлебам-соллю, як у папярэдніх парафіях, але яшчэ і з разасланым саматканым дываном, які распасцёрся на дзясяткі метраў ад брамы да самога касцёла.

Паколькі гэтага дня было ветранае надвор’е, вернікі, сярод якіх былі дзеці і моладзь, а таксама пажылыя людзі, трымалі дыван, каб яго не панесла ветрам. Мітрапаліт, клапоцячыся аб працы тых, хто выткаў дыван, не хацеў ступаць па покрыве, аднак парафіяне настаялі на гэтым.

Арцыпастыр, споўніўшы волю вернікаў, прайшоў гэты шлях у вялікай задуме і павазе. Потым ён сказаў пра гэта так:

«Я ішоў і спазнаваў вашу гісторыю, вашых продкаў, вашу любоў да працы і да Бога».

Падчас кожнай святой Імшы Мітрапаліт Станеўскі маліўся аб патрэбных ласках для вернікаў і аб жыцці вечным для тых, хто адыйшоў у вечнасць. Асаблівай малітвай іерарх ахінуў дзяцей і моладзь, а таксама сем’і. Арцыпастыр таксама ўзнёс малітву за ўсіх тых, хто на розных узроўнях свецкай ўлады клапоціцца аб дабрабыце і міры на нашай зямлі.

Перапоўненыя ўражаннямі, седзячы ў сваім, сабраным у Беларусі, аўтамабілі Джылі Атлас, з кветкамі і духмянымі караваямі у салоне, пілігрымы вярталіся дадому, ўдзячныя Богу за яшчэ адзін момант сустрэчы чалавека з чалавекам, а ўсіх разам праз малітву — з Богам.