У Заслаўі адбылася парафіяльная ўрачыстасць у гонар Нараджэння Найсвяцейшай Панны Марыі

На святкаванне па запрашэнні мясцовага пробашча ксяндза каноніка Антонія Клімантовіча з’ехаліся госці з розных куткоў архідыяцэзіі. Цэлебрацыю святой Імшы ўзначаліў Мітрапаліт Мінска-Магілёўскі арцыбіскуп Юзаф Станеўскі.

Урачыстасці папярэднічала глыбокая духоўная падрыхтоўка ў выглядзе парафіяльных місій, якія прайшлі з 31 жніўня па 7 верасня. У апошні дзень місій у Заслаўе завітаў таксама арцыбіскуп эмэрыт Тадэвуш Кандрусевіч, які ўзначаліў святую Імшу, а таксама асвяціў вітраж і місійны крыж.

Перад пачаткам супольнай эўхарыстычнай малітвы ў свята Нараджэння Багародзіцы вернікі выканалі шмат прыгожых марыйных спеваў, пасля якіх пробашч заслаўскага касцёла цёпла прывітаў усіх прысутных, у тым ліку дастойнага іерарха Юзафа Станеўскага і сабратоў у святарстве, а менавіта ксяндза каноніка Яна Крэміса, пробашча парафіі Святога Духа ў Мінску, ксяндза каноніка Дзмітрыя Пухальскага, канцлера курыі Мінска-Магілёўскай архідыяцэзіі і пробашча архікатэдральнай парафіі Імя Найсвяцейшай Панны Марыі ў Мінску, ксяндза каноніка Ігара Лашука, пробашча парафіі святога Казіміра ў Стоўбцах, ксяндза каноніка Андрэя Яркаўца, пробашча парафіі святога Міхала Арханёла ў Багданаве, ксяндза каноніка Юрыя Быкава, пробашча парафіі Святой Тройцы ў Радашковічах, ксяндза Анатоля Парахневіча, пробашча парафіі ў Альковічах, ксяндза каноніка Юрыя Ясевіча, сакратара Мітрапаліта і мітрапалітальнай курыі, ксяндза Андрэя Сіповіча, пробашча парафіі Узвышэння Святога Крыжа ў Мінску, а таксама сясцёр дамініканак, што служаць у Заслаўі.

На пачатку святой Імшы арцыбіскуп Станеўскі падзякаваў пробашчу Антонію Клімантовічу за запрашэнне і, працытаваўшы выказванне святога Аўгустына «Бог дае вецер, а чалавек павінен рашыцца распусціць ветразі», заахвоціў прысутных супрацоўнічаць з Божай ласкай.

Падчас гаміліі іерарх засяродзіўся на важнасці падзеі Нараджэння Панны Марыі ў гісторыі збаўлення, пра што сведчылі біблійныя тэксты дня з Кнігі прарока Міхея і Евангелля паводле Мацвея аб нараджэнні Езуса.

«Той, хто выконвае Евангелле, малады маладосцю Езуса Хрыста. Езус жыве і хоча, каб ты жыў. Марыя прыходзіць, каб удзельнічаць у збаўчай місіі Езуса Хрыста, каб нас прывесці да Яго», ― нагадаў словы Папы Францішка арцыпастыр.

Ён таксама падкрэсліў, што ў свой час святы Папа Ян Павел ІІ казаў, што

Мітрапаліт адзначыў, што вернікі ў Беларусі аддана ўшаноўваюць Багародзіцу, чаму сведчаннем з’яўляюцца летнія пілігрымкі ў марыйныя санктуарыі, у тым ліку нядзельны фэст у Бялынічах, які сёлета сабраў болей за 700 удзельнікаў і чакае яшчэ большую іх колькасць наступнай восенню, калі будзе адзначацца 265-годдзе каранацыі папскімі каронамі абраза Маці Божай Бялыніцкай, Каралевы Беларусі.

Таму, на думку іерарха, такі фэст у Заслаўі таксама закранае, падбадзёрвае, цікавіць.

«Вядома, што свята Нараджэння Панны Марыі называюць святам Маці Божай Сеўнай. І нездарма.

― правёў аналогію прамоўца.

Мітрапаліт падсумаваў, што да Бога вядзе шмат дарог, як вучылі святы Аўгустын і Папа Бэнэдыкт ХVI, і мы, як Марыя, павінны шукаць і выконваць волю Бога ў сваім жыцці. Fiаt Марыі — гэта ўзор для нас, таму мы павінны быць не толькі пілігрымамі, але і апосталамі надзеі.

У працяг гэтай думкі іерарх пажадаў мясцовай супольнасці, каб праз год у парафіі было ў два разы больш вернікаў, і даў парафіянам «хатняе заданне»: прывесці двух новых членаў у супольнасць.

«А як хто прывядзе трох новых, то можна і званне прафесара рэлігіі прысвоіць», ― жартам дадаў арцыпастыр, завяршаючы гамілію. 

Падчас насычанай заклікамі малітвы вернікаў прысутныя маліліся за Касцёл, за кансэкраваных асобаў, за бацькоў, за тых, хто шукае Праўду, за ўдзельнікаў Эўхарыстыі, за арцыбіскупа Юзафа, за пробашча, за моладзь, за аграрыяў напярэдадні Дажынак, а затым у цішыні сэрцаў у гэты святочны дзень прадстаўлялі Богу свае асабістыя просьбы.

Напрыканцы Імшы парафіяне падзякавалі Мітрапаліту за ўзначаленне цэлебрацыі і пракаментавалі, што з імпэтам успрынялі евангелізацыйнае заданне.

Затым адбылося выстаўленне Найсвяцейшага Сакрамэнту і эўхарыстычная працэсія вакол касцёла, якую завяршыў урачысты спеў «Цябе, Бога, праслаўляем» і пастырскае благаслаўленне.

Заканчэнне ўрачыстасці вернікі упрыгожылі вельмі кранальным мясцовым спевам «Каралева Анёлаў у заслаўскай святыні, умацуй нашу веру…», пасля чаго Мітрапаліт падзякаваў пробашчу заслаўскай парафіі за запрашэнне, за добраўпарадкаванне святыні і тэрыторыі вакол яе, а таксама выказаў надзею на тое, што парафіяне выканаюць «хатняе заданне» і будуць часцей распавядаць пра сваю парафію і святыню ў сваіх асяроддзях.