Цэлебрацыю ўрачыстай літургіі ўзначаліць арцыбіскуп эмэрыт Тадэвуш Кандрусевіч. Нагадаем, што іерарху сёлета споўнілася 80 гадоў.
Пасля Эўхарыстыі святкаванне працягнецца ва ўнутраным двары мінскай катэдры.
«Я не забуду пра цябе» (Іс 49,15) — так гучыць тэма, якую 10 лютага Папа Леў XIV выбраў для VI Сусветнага дня бабуль, дзядуль і пажылых людзей, каб нагадаць, што нават калі кожны чалавек старэе, любоў Бога да яго не слабее ніколі, паведамляе Беларуская рэдакцыя Vatican News.
«Выбраны радок з Кнігі прарока Ісаі пакліканы стаць пасланнем суцяшэння і надзеі для ўсіх бабуль, дзядуль і пажылых людзей, асабліва для тых, якія жывуць у самотнасці ці адчуваюць сябе забытымі. У той жа час ён з’яўляецца заклікам да сем’яў і касцёльнай супольнасці не забываць пра іх, прызнаючы ў іх каштоўную прысутнасць і благаслаўленне»,
— паведаміла Дыкастэрыя па справах свецкіх, сям’і і жыцця.
У сваім пасланні на гэты дзень, якое было абнародавана 15 чэрвеня, Папа падкрэсліў, што Касцёл пакліканы быць маці для кожнага чалавека ў любым узросце. Ён заклікаў моладзь аднавіць прыгожую звычку наведваць сваіх дзядуль, бабуль і самотных пажылых людзей. Праз сваю прысутнасць маладыя людзі могуць перадаць старэйшым блізкасць і цеплыню.
Сусветны дзень бабуль, дзядуль і пажылых людзей, устаноўлены Папам Францішкам у 2021 годзе, адзначаецца кожную чацвёртую нядзелю ліпеня і з’яўляецца нагодай, каб выказаць пажылым блізкасць Касцёла і адкрыць каштоўнасць іх укладу ў жыццё сем’яў і грамадства. Сёлета яго дата — 26 ліпеня — супадае з успамінам святых Яўхіма і Ганны.
