У Беразіне адзначылі ўрачыстасць Маці Божай Міласэрнасці

16 лістапада

17 лістапада, 2025
Тэкст і фота: Віктар Ведзень // Catholicminsk.by

16 лістапада бярэзінскія вернікі ў браме сваёй святыні сустракалі Генеральнага вікарыя Мінска-Магілёўскай архідыяцэзіі біскупа Аляксандра Яшэўскага SDB.

«Ваша Эксцэленцыя, з вялікай павагай і ўдзячнасцю вітаем Вас у нашай парафіі Маці Божай Міласэрнасці! Візіт біскупа ў парафію — гэта заўсёды гістарычны момант, звязаны з важнай падзеяй. Таму просім Вас асвяціць гэты камень як сімвал вечнай трываласці і таблічку на ім, дзе узгадваецца гісторыя многіх пакаленняў вернікаў на бярэзінскай зямлі. А таксама просім узначаліць святую Імшу ў гонар Маці Божай Міласэрнасці»,

— звярнуліся парафіяне напачатку.

На месцы, дзе біскуп асвяціў усталяваную таблічку, парафіяне пажадалі ўвекавечыць падзею пабудовы цяперашняй святыні, яе асвячэнне, а таксама кароткія гістарычныя звесткі з жыцця каталіцкай супольнасці ў гэтым кутку Беларусі. Так, першы касцёл тут быў пабудаваны ў 1644 годзе ў гонар Маці Божай з гары Кармэль. У 1803 годзе перабудаваны і пасвечаны пад тытулам Унебаўзяцця Найсвяцейшай Панны Марыі. Сучасная святыня, пабудаваная на ахвяраванні вернікаў, была асвечана Мітрапалітам Мінска-Магілёўскім арцыбіскупам Юзафам Станеўскім 8 чэрвеня 2024 года.

Таксама ў святыні іерарх асвяціў новаўсталяваны трон як месца для цэлебранта ў алтарнай частцы касцёла.

На пачатку Эўхарыстыі дастойных гасцей прывітаў пробашч парафіі ксёндз магістр ліцэнзіят Юзаф Сярпейка. Святар назваў прысутнасць біскупа адметнай рысай еднасці Каталіцкага Касцёла ў межах архідыяцэзіі і глыбокай лучнасці з першым намеснікам Хрыста на зямлі — Папам Львом XIV. У літургіі ўдзельнічалі ксёндз Віталій Стрыга — дэкан Барысаўскага дэканата і пробашч парафіі святога Юзафа ў Крупках, і айцец Сяргей Більдзіс SAC — пробашч парафіі святога Антонія ў Талачыне (Віцебская дыяцэзія).

Біскуп Яшэўскі маліўся за парафію і аб новых пакліканнях да святарскага і манаскага жыцця, а запрошанае духавенства — у парафіяльных інтэнцыях.

«Горача прашу маліцца за церпячых і хворых з нашай парафіі! Гэта тыя, хто моцна прагне быць разам з намі ў святыні, аднак з прычыны адсутнасці здароўя не мае для гэтага сілаў»,

— завяршыў прывітанне пробашч.

У гаміліі іерарх засяродзіў увагу прысутных на прыгожай адметнасці сённяшняй урачыстасці: Маці Божая можа і павінна стаць Маці ўсіх. Яна хоча, каб вернікі ва ўсіх патрэбах прыходзілі да Яе, слухалі Яе, вучыліся ад Яе любові. Яна заўсёды гатовая заступіцца за верны люд перад сваім Сынам.

«Звяртайцеся да Яе ў сваім смутку: калі вас апануе сум, трывога, страх ці расчараванне, не саромейцеся звяртацца да Маці Божай. Маліцеся да Яе, як да сваёй Маці, якая заўсёды гатовая выслухаць і падтрымаць. Няхай вашыя малітвы будуць шчырымі, напоўненымі верай і надзеяй»,

— заахвоціў біскуп Аляксандр.

Святую Імшу ўпрыгожыў спевам парафіяльны хор пад кіраўніцтвам арганісткі Іны Рымашэўскай.

Душпастыр бярэзінскай парафіі выказаў асаблівую падзяку дабрадзеям за аказаную дапамогу ў прывязенні каменя, вырабе і інсталяцыі таблічкі, выкананні п’едэстала для трона цэлебранта. Словы ўдзячнасці былі скіраваныя таксама да літургічнай службы алтара і касцёльнага камітэта за ініцыятыўнасць у падрыхтоўцы ўрачыстасці і клопат пра развіццё парафіі. Падзяка прагучала і ў адрас галоўнага рэдактара «Бярэзінскай праўды» за асвятленне мерапрыемства каталіцкай парафіі сярод чытачоў раённай газеты.

На заканчэнне вернікі падзякавалі Генеральнаму вікарыю за кранальныя словы гаміліі і ўсім прысутным святарам за супольную малітву.