На Станцыі Ашмяны з удзелам арцыбіскупа Кандрусевіча ўшанавалі благаслаўлёнага Міхала Сапоцьку

Урачыстую Імшу ў капліцы Божай Міласэрнасці і благаслаўлёнага Міхала Сапоцькі ўзначаліў сам іерарх.

Пасля прывітальных слоў у адрас дастойнага госця і ўсіх прысутных, якія прамовіў пробашч на пачатку Эўхарыстыі, арцыбіскуп Тадэвуш акрапіў вернікаў асвечанай вадой.

У гаміліі ён падкрэсліў, што Божая міласэрнасць з’яўляецца адной з галоўных прыкметаў Бога. «З любові да чалавека Бог стварыў яго паводле свайго вобразу і падабенства. Калі ж чалавек адвярнуўся ад Бога і зграшыў, то Ён яго не пакінуў  аднаго, але паабяцаў збаўленне», — нагадаў арцыпастыр, дадаючы, што Бог пасылаў прарокаў, каб яны клапаціліся пра духоўны стан чалавека, цудоўным чынам вывеў выбраны народ з егіпецкай няволі, даў яму Дзесяць запаведзяў у якасці указальнікаў на яго жыццёвым шляху. А калі прыйшла поўня часу, Бог паслаў свайго Сына, каб Ён сваёй крыжовай смерцю збавіў чалавека.

«Чаму Бог так паступіў? — запытаў прысутных іерарх. — Ён мог сказаць: “Ты, чалавек, зграшыў і сам разбірайся са сваімі праблемамі”. Але так не сказаў, бо не мог дапусціць, каб створаны паводле Яго вобразу і падабенства чалавек навекі страціў Божы вобраз і падабенства».

— растлумачыў прамоўца.

Ён нагадаў, што Бог таксама хацеў, каб культ Яго міласэрнасці развіваўся і ахінуў як мага больш людзей. Для гэтага Ён выбраў дзве асобы — законніцу Фаўстыну Кавальскую і святара Міхала Сапоцьку.

«Міласэрны Езус аб’явіўся сястры Фаўстыне. Частка гэтых аб’яўленняў адбылася ў Вільні, дзе валадарыць Маці Божая Вастрабрамская — Маці Міласэрнасці. Як па просьбе Марыі Езус учыніў першы цуд у Кане Галілейскай, таксама нельга выключаць, што па просьбе Маці Божай Вастрабрамскай адбыліся аб’яўленні Езуса Міласэрнага сястры Фаўстыне Кавальскай», — выказаў здагадку арцыпастыр.   

У місію распаўсюджвання Божай міласэрнасці, працягваў ён, Бог уключыў «сына нашай зямлі» — ксяндза Міхала Сапоцьку. Ён быў прызначаны спаведніком сясцёр Міласэрнасці, сярод якіх была і візіянерка Езуса Міласэрнага сястра Фаўстына. Менавіта яна пачала распавядаць яму аб аб’яўленнях Езуса Міласэрнага.

«Напачатку ксёндз Міхал са зразумелай асцярожнасцю аднёсся да яе слоў. Доўга даследаваў гэтую справу. Маліўся і прасіў Духа Святога аб дапамозе ў належным яе распазнанні. Шукаў адказ ў Святым Пісанні і тэалогіі. Яму нялёгка было прыняць рашэнне, але ён яго прыняў, параіўшы Фаўстыне весці Дзённік аб’яўленняў Езуса Міласэрнага. Сёння гэты “Дзённік” з’яўляецца скарбніцай вучэння аб Божай Міласэрнасці», — распавядаў галоўны цэлебрант.

«Сёння мы дзякуем благаслаўлёнаму Міхалу Сапоцьку за тое, што ён перадаў нам надзею ў набажэнстве да Божай Міласэрнасці ў складаныя часы ганенняў на веру, калі здавалася, што Евангелле больш ніколі не будзе абвяшчацца на нашай зямлі, — сказаў ён. — Гэтая надзея падтрымлівала наш народ і вяла да свабоды веравызнання».

Арцыпастыр сцвердзіў, што ў рэшце рэшт «мы яе атрымалі, але не можам спаць спакойна, бо плыні секулярызму, маральнага рэлятывізму і этычнага лібералізму вядуць чалавека не да Бога, але адводзяць ад Бога». Ён папярэдзіў слухачоў: «Сёння, у эпоху постмадэрнізму, абвяшчаецца абсалютная свабода без адказнасці. Гэта ідэалогія адкідвае Божы закон і маральныя нормы, бо яны нібыта перашкаджаюць свабодзе чалавека».

«Куды мы ідзём? На якіх прынцыпах будуем сваю будучыню і маральнае жыццё ў гэтай складанай сітуацыі? Да каго мы звяртаемся?» — спытаўся прамоўца і, спаслаўшыся на шырока вядомага ў Беларусі святога, даў наступны адказ:

Напрыканцы гаміліі арцыбіскуп Кандрусевіч скіраваў зварот да нябеснага заступніка капліцы на станцыі Ашмяны: «Звяртаемся да цябе, наш земляк і нябесны заступнік, благаслаўлёны Міхал Сапоцька. Выпрасі ў Бога ласку, каб культ Божай міласэрнасці далей распаўсюджваўся па ўсім свеце і каб кожны чалавек меў адвагу кінуцца ў яе акіян».

Апошнія словы гаміліі прагучалі як малітва:

Напрыканцы Імшы да галоўнага цэлебранта, які ў бягучым годзе святкуе сваё 80-годдзе і 45-годдзе святарскага пасвячэння, са словамі віншаванняў звярнуліся прадстаўнікі дзяцей і моладзі, а таксама іх бацькі. Дзеці выстраіліся ў чаргу, каб падарыць іерарху прыгожую ружу і атрымаць ад яго асабістае благаслаўленне і памятны абразок. Пасля гэтага ў руках іерарха аказаўся вялікі букет чырвоных ружаў, які быў дапоўнены такім жа букетам белых ружаў — ужо ад дарослых. Але асаблівым падарункам для арцыпастыра быў незвычайна цяжкі, хоць і невялікі, абраз Маці Божай з Дзіцяткам Езусам, выразаны з дубовага дрэва, які падаравалі яму прадстаўнікі касцёльнага сходу.

Адказваючы на віншаванні, арцыбіскуп Тадэвуш Кандрусевіч запрасіў дзяцей на кароткую размову, пасля чаго яны атрымалі цікавыя падарункі.

Святая Імша завяршылася пастырскім благаслаўленнем, якое ўдзяліў прысутным іерарх, і ўшанаваннем рэліквіяў благаслаўлёнага Міхала Сапоцькі, якія знаходзяцца ў капліцы на Станцыі Ашмяны.