Caritas Мінска-Магілёўскай архідыяцэзіі праводзіць майстар-класы ў дзіцячых школах-інтэрнатах (ВІДЭА)

Паездкі супрацоўнікаў і валанцёраў Caritas Мінска-Магілёўскай архідыяцэзіі ў школы-інтэрнаты да дзяцей – гэта стварэнне асяроддзя, якое спрыяе іх гарманічнаму развіццю і паспяховай інтэграцыі ў грамадства. Менавіта з гэтай мэтай на рэгулярнай аснове арганізуюцца паездкі ў Гарадзейскую і Бялыніцкую школы-інтэрнаты.

У суботу быў праведзены шэраг навучальных майстар-класаў у Гарадзеі, накіраваных на развіццё розных навыкаў у дзяцей.

Так, майстар-клас па стрэтчынгу дапамог дзецям палепшыць фізічны стан і развіць каардынацыю і пластычнасць.

Заняткі па вырабах з коркаў і пластыліну раскрылі творчы патэнцыял дзяцей, навучылі іх працаваць з рознымі матэрыяламі і ствараць арыгінальныя рэчы сваімі рукамі.

Падчас кулінарнага майстар-класа дзеці вучыліся новым спосабам прыгатавання, а потым з задавальненнем спрабавалі свае ж кулінарныя шэдэўры на смак.

Прадстаўнікі Caritas і на гэты раз прывезлі перасоўную гульнявую пляцоўку «Рух у радасць», якая стала сапраўдным цэнтрам прыцягнення.

Разнастайнасць інклюзіўных гульняў дазволіла кожнаму дзіцяці знайсці нешта па душы, незалежна ад ягоных фізічных магчымасцяў ці індывідуальных прыхільнасцяў.