Курыя Пінскай дыяцэзіі са смуткам паведамляе, што ў нядзелю 8 лютага на 81-м годзе зямнога жыцця, 42-м годзе святарства, 27-м годзе біскупскага служэння адышоў у вечнасць біскуп Казімір Велікаселец, дапаможны біскуп Пінскай дыяцэзіі на пенсіі.
Казімір Велікаселец нарадзіўся 5 мая 1945 года у вёсцы Стараволя Пружанскага раёна. У 1981 годзе быў прыняты ў Рыжскую духоўную семінарыю. Падчас вучобы ў семінарыі склаў першыя законныя шлюбы ў манаскі ордэн айцоў дамініканаў. Пасля заканчэння Рыжскай семінарыі ў 1984 годзе атрымаў сакрамэнт святарскага пасвячэння з рук кардынала Юліяна Вайвадса. Працаваў у парафіях у Ішкалдзі, Баранавічах, Брэсце, абслугоўваў таксама іншыя касцёлы. 24 чэрвеня 1999 года ў пінскай катэдры адбылося біскупскае пасвячэнне Казіміра Велікасельца, якое здзейсніў кардынал Казімір Свёнтэк.
3 студзеня 2021 года Папа Францішак прызначыў біскупа Казіміра Велікасельца Апостальскім адміністратарм Мінска-Магілёўскай архідыяцэзіі ad nutum Sanctae Sedis. Знаходзіўся ён на гэтай пасадзе да 23 кастрычніка 2021 года.
8 лютага 2026 года ў Гомельскім гарадскім кардыялагічным цэнтры біскуп Казімір Велікаселец адышоў у вечнасць. Ён быў найстарэйшым паводле ўзросту беларускім каталіцкім іерархам.
Праграма развітання і пахавання
Увага! Адбыліся змены.
Гомель, 10 лютага, аўторак:
19.00 — святая Імша з Нешпарамі за святой памяці біскупа Казіміра ў касцёле Нараджэння Найсвяцейшай Панны Марыі ў Гомелі (вул. Савецкая, 118).
Пінск, 11 лютага, серада:
18.30 — святая Імша з Нешпарамі за святой памяці біскупа Казіміра ў катэдральным касцёле Унебаўзяцця Найсвяцейшай Панны Марыі ў Пінску (вул. Леніна, 16).
Пінск, 12 лютага, чацвер:
11.00 — Ютрань за святой памяці біскупа Казіміра ў катэдральным касцёле;
11.30 — пахавальная святая Імша за біскупа Казіміра Велікасельца і абрады пахавання ў Пінскім катэдральным касцёле (вул. Леніна, 16).
Пасля святой Імшы труна з целам біскупа Казіміра будзе перавезена згодна з завяшчаннем у яго родную парафію ў Шэрашаве (Пружанскі р-н), дзе ён будзе пахаваны на мясцовых могілках каля касцёла.
Вечны адпачынак дай яму, Пане…
