Эўхарыстыю ўзначаліў арцыбіскуп Юзаф Станеўскі, Мітрапаліт Мінска-Магілёўскі. Разам з супольнасцю братоў Ордэна меншых братоў капуцынаў на чале з кусташам братам Алегам Шэндам OFMCap і вернікамі парафіі святога Францішка Асізcкага ва ўрачыстай святой Імшы прынялі ўдзел і асобы, якія наведвалі пакутныя набажэнствы «Песняў жальбы» у так званых стацыйных касцёлах.
Да агульнай малітвы падчас Вялікага посту далучыліся у якасці такіх «стацый» наступныя парафіі: архікатэдра Імя Найсвяцейшай Панны Марыі, парафія Узвышэння Святога Крыжа (Кальварыя), парафія Святога Духа (Чыжоўка), парафія Божага Цела (Ангарская), парафія святога Францішка Асізскага (аграгарадок Копішча), парафія Маці Божай Будслаўскай (Каменная горка), парафія Нараджэння Найсвяцейшай Панны Марыі (горад Заслаўе).
Як сведчаць вернікі, якія бралі ўдзел у пакутным набажэнстве і якія ў сваю чаргу належаць да розных парафіяльных супольнасцяў, пакутныя набажэнствы «Песняў жальбы» — гэта добрая нагода і магчымасць пазнаёміцца з новымі асобамі, святарамі, пазнаць новыя касцёлы, каб пасля як адна касцёльная супольнасць, у малітве разважаючы над мукамі і смерцю Езуса Хрыста, выпрошваць для сябе, блізкіх, Касцёла і Айчыны патрэбныя ласкі.
