Tolle et lege — бяры і чытай: кніжныя парады на Вялікі пост
- 18 лютага, 2026
- Ілюстрацыйнае фота: en.wikipedia.org // Catholicminsk
- Паводле pro-christo.catholic.by
Сёння распачынаецца літургічны перыяд Вялікага посту, час інтэнсіўнай малітвы і шчырага навяртання перад Урачыстасцю Змёртвыхпаўстання Пана.
Касцёл у сваёй мудрасці на працягу стагоддзяў выпрацаваў шмат практык, якія спрыяюць духоўнаму росту і фармаванню пабожнай свядомасці ў гэты час: гэта і набажэнства Крыжовага шляху, і спяванне «Песняў жальбы», і практыка ўстрымання ад ежы, якая прыносіць задавальненне, а таксама канкрэтныя пастановы ў працы над сваімі заганамі і грэшнымі схільнасцямі, рэкалекцыі г. д.
Безумоўна, для хрысціяніна найбольш важнай і незаменнай кнігай з’яўляецца Святое Пісанне. Апрача гэтага, дазволіць Богу прамаўляць да свайго сэрца можна, правёўшы час у чытанні годных увагі выданняў хрысціянскіх аўтараў.
Прапануем вашай увазе падборку 5 кніг айчыннага выдавецтва Pro Christo, якія дапамогуць лепш перажыць перыяд Вялікага посту.
1. Юзаф Аўгустын SJ
САКРАМЭНТ ПАКАЯННЯ
Указанні для пэнітэнта і спаведніка
Кніга будзе карысная ўсім, хто хоча больш свядома і плённа прыступаць да сакрамэнту пакаяння. Яна прызначана і для пэнітэнтаў, і для спаведнікаў. Аўтар дае асабістае сведчанне, прыводзіць пэўныя практычныя інструкцыі для спаведнікаў і закранае асноўныя пытанні, якія датычаць споведзі: што такое сакрамэнт пакаяння? Якая роля святара? Як чалавек перажывае раскаянне? Вялікая ўвага ўдзяляецца магчымым праблемам у адносінах паміж пэнітэнтам і спаведнікам, а таксама спосабам іх вырашэння.
2. Юзаф Аўгустын SJ
ЧВЭРЦЬ ГАДЗІНЫ ШЧЫРАСЦІ
Уводзіны ў малітву штодзённага рахунку сумлення
Кніга змяшчае два ўступныя разважанні пра тое, што значыць сур’ёзна ставіцца да свайго жадання маліцца і ў чым заключаецца сэнс агульнага рахунку сумлення, а таксама пяць разважанняў, якія грунтуюцца на паасобных пунктах рахунку сумлення, прапанаваных святым Ігнацыем Лаёлам у «Духоўных практыкаваннях». Напрыканцы кожнага разважання чытачам прапаноўваюцца канкрэтныя практыкаванні, якія можна выкарыстоўваць у якасці ўводзінаў у асабістую малітву.
3. Анна Чайкоўска WDC
АДПУСТЫ — СКАРБ КАСЦЁЛА
Кніга пра адзін з самых недаацэненых духоўных скарбаў, які мы можам атрымліваць штодзённа пры пэўных умовах. У гэтай кнізе падаецца вучэнне Каталіцкага Касцёла пра адпусты і распавядаецца пра тое, як вернікі могуць скарыстацца гэтай невычэрпнай яго скарбніцай, якія ўмовы неабходна выканаць, каб атрымаць адпуст за сябе або ахвяраваць яго за памерлага. У часе Вялікага Посту такія малітоўныя практыкі могуць прынесці шмат духоўнай карысці.
4. Святы Альфонс Лігуоры
НАВЕДВАННЕ НАЙСВЯЦЕЙШАГА САКРАМЭНТУ
Месцы, дзе адбываецца ўшанаванне Езуса Эўхарыстычнага, адзначаюцца вялікімі ласкамі: аздараўленнямі, навяртаннямі, пакліканнямі да кансэкраванага жыцця.
Кніга святога Альфонса Лігуоры «Наведванне Найсвяцейшага Сакрамэнту» — гэта асаблівы скарб для тых, хто жадае прабываць перад Езусам Эўхарыстычным і выкарыстоўваць парады святога доктара Касцёла дзеля паглыблення адносінаў з Хрыстом. Кніга складаецца з разважанняў, у кожным з якіх адкрываецца глыбокая праўда пра прысутнасць Пана Езуса ў Найсвяцейшым Сакрамэнце.
5. Святая сястра Фаўстына Кавальская ZMBM
ДЗЁННІК
Божая Міласэрнасць у маёй душы
Святая сястра Фаўстына Кавальская пісала свой «Дзённік» на працягу апошніх чатырох гадоў жыцця (1934–1938) па наказе духоўнага кіраўніка благаслаўлёнага ксяндза Міхала Сапоцькі і па выразным загадзе Пана Езуса, з якім яна кантактавала містычным чынам. Праз сястру Фаўстыну мы атрымалі пасланне аб невычэрпнай міласэрнасці Бога да ўсяго чалавецтва і Яго неспасцігальнай любові да нас.
Менавіта ў «Дзённіку» святая Фаўстына запісала прадыктаваны Панам Езусам «Вяночак да Божай Міласэрнасці», «Навэнну перад святам Божай Міласэрнасці», якая распачынаецца ў Вялікую пятніцу, а таксама літанію да Божай Міласэрнасці.
Гэтая кніга — не толькі багатая крыніца для спазнання вялікай міласэрнасці Бога, але і гісторыя глыбокіх містычных адносінаў душы з Панам Богам.
Містычны досвед сястры Фаўстыны робіць асабліва каштоўнымі яе парады наконт споведзі, рахунку сумлення, дапамагае лепш зразумець сэнс і вялікае значанне Мукі і Ахвяры Хрыста.
Азнаёміцца з поўным каталогам выданняў і замовіць іх вы можаце на сайце выдавецтва.
Добры выбар духоўнай літаратуры прадстаўлены таксама ў кіёску архікатэдральнага касцёла ў Мінску.
