Свята для сямей Дзіцячага рэабілітацыйнага цэнтра святога Лукі адбылося пад Мінскам

Дзіўна, але ў лютым адразу дзве асаблівыя даты для тых, хто так ці інакш звязаны з анкалагічнай хваробай. 4 лютага – Сусветны дзень барацьбы супраць раку, а 15 лютага – Міжнародны дзень дзяцей, хворых на рак. Суседства гэтых падзей са святам Святога Валянціна зусім выпадковае. Але штосьці ў гэтым ёсць – адзін дзень розніцы паміж Днём закаханых і Днём любові да дзяцей, якім вельмі патрэбны наш клопат і падтрымка.

Для супрацоўнікаў і валанцёраў “Caritas” Мінска-Магілёўскай архідыяцэзіі гэта заўсёды дзень моцных і смелых сем’яў, якія валодаюць велізарнай воляй і імкненнем да жыцця. Менавіта ў гэтых людзей кожны дзень іншыя вучацца шанаваць кожнае імгненне на зямлі. Яны вераць у сілу любові і клопату, якія здольныя рабіць цуды нават у самых складаных сітуацыях, і працягваюць працаваць над тым, каб кожная сям’я ў Дзіцячым рэабілітацыйным цэнтры святога Лукі адчувала сябе камфортна.

14 лютага была выдатная нагода падзяліцца увагай і цяплом з іншымі. А дзяліцца клопатам з тымі, хто мае ў гэтым патрэбу, вельмі важна. У “Caritas” хочуць, каб любові ў гэтым свеце было больш, кожны люты імкнучыся напаўняць Дзіцячы рэабілітацыйны цэнтр святога Лукі “сардэчнай” сімволікай, каб парадаваць дзяцей з анкалогіяй – і гэта ўсё таксама пра любоў.