Мастацкая фотавыстава «Рараты» Віктара Ведзеня адкрылася ў архікатэдральным касцёле ў Мінску

30 лістапада

2 снежня, 2025
Фота: з прыватнага архіва Віктара Ведзеня // Catholicminsk.by

У нядзелю, 30 лістапада, у першы дзень Адвэнту, у архікатэдральным касцёле Імя Найсвяцейшай Панны Марыі ў Мінску адкрылася фотавыстава «Рараты» фатографа і фотажурналіста Віктара Ведзеня.

Адкрыццё выставы адбылося падчас святой Імшы, якую ўзначаліў арцыбіскуп Юзаф Станеўскі, Мітрапаліт Мінска-Магілёўскі. Іерарх заахвоціў вернікаў пазнаёміцца з экспазіцыяй і пранікнуцца духам Адвэнту. Ён нагадаў, што адвэнт — гэта не толькі час чакання Божага Нараджэння, але і час унутранай падрыхтоўкі.

На экспазіцыі прадстаўлены партрэты вернікаў, якія бяруць удзел у ранішніх раратных Імшах. Іх выявы — гэта адлюстраванне духоўных перажыванняў, надзеі і веры, якія дапамагаюць падрыхтавацца да вялікага свята.

Рараты — адмысловыя святыя Імшы ў перыяд Адвэнту. Назва «Рараты» бярэ свой пачатак ад лацінскай песні Rorate coeli desuper («Дайце, нябёсы, росы з вышыняў»), якая спяваецца ў перыяд Адвэнту, звычайна на пачатку раратняй Імшы: чым для высахлай зямлі з’яўляецца раса, тым Хрыстус для тых, хто Яго чакае.

У Беларусь гэтая традыцыя прыйшла з Захаду, дзе была вядома ўжо ў XIII стагоддзі. Традыцыйна Рараты адбываюцца перад усходам сонца. У касцёле пагашана святло, толькі гараць раратнія ліхтарыкі, якія прыносяць з сабою людзі звычайна запаленымі, ідучы з дому ў святыню, асвятляючы змрок. Адбываецца набажэнства, якое асаблівым чынам нагадвае нам пра Марыю, як пра Маці Езуса і Маці Касцёла, якая вучыць нас сапраўднаму чуванню перад нараджэннем Сына Божага.

Раней фотавыстава была паказана ў касцёле Найсвяцейшай Тройцы (святога Роха) на Залатой Горцы ў Мінску, касцёле Святога Сымона і Святой Алены ў Мінску (Чырвоны касцёл), народным фотаклубе «Мінск», а таксама серыя фотапрац у 2020 годзе была прадстаўлена ў намінацыі «Мастацкая фатаграфія» на Рэспубліканскай выставе «Трыенале сучаснага мастацтва» па выніках Рэспубліканскага конкурсу «Нацыянальная прэмія ў галіне выяўленчага мастацтва».

«Аднойчы, прыйшоўшы на такое ранішняе набажэнства, я быў уражаны тварамі людзей і іх позіркамі. Адчувалася, што кожны з іх сапраўды чакае прыйсця Збаўцы. Сваёй малітвай набліжаюць час Божага Нараджэння, што дае надзею… А святло ад знічаў нібы асвячае Яму шлях, як зоркі, якія ззяюць у цемры. У той момант мне захацелася падзяліцца гэтай атмасферай з іншымі»,

— дзеліцца аўтар.

На працягу ўсяго часу працы выставы экспазіцыя будзе абнаўляцца і дапаўняцца. Наведаць мастацкую выставу «Рараты» можна да 24 снежня ў архікатэдральным касцёле Імя Найсвяцейшай Панны Марыі ў Мінску.

Адрас: Мінск, плошча Свабоды, 9.

Час: з 6.45 да 19.30.