ЛІСТЫ ЧЫТАЧОЎ: Беларускія пілігрымы ў Вечным горадзе памаліліся разам з маладымі біскупамі-землякамі

Падчас гэтага духоўнага падарожжа ўдзельнікі наведалі наступныя мясціны:

• Чэнстахова (Польшча), дзе адбылася святая Імша ў капліцы цудадзейнага абраза і марыйны заклік),
• Вена (Аўстрыя), па якой беларускія пілігрымы прайшліся пешшу,
• Фларэнцыя (Італія), дзе вернікі памаліліся ў базыліцы Маці Божай,
• Рым (Італія) і Ватыкан, дзе пілігрымы наведалі найважнейшыя духоўныя, гістарычныя і культурныя каштоўнасці,
• Падуя (Італія), дзе пілігрымы выпрошвалі патрэбныя ласкі ў базыліцы святога Антонія, вельмі шанаванага ў Беларусі,
• Будапешт (Венгрыя), у якім беларускія вернікі наведалі базыліку святога Стэфана. 

Кульмінацыйным пунктам гэтай пілігрымкі быў побыт у Рыме. Дзень у Вечным горадзе быў даволі насычаным. У дольнай капліцы Маці Божай Чэнстахоўскай, якая знаходзіцца ў базыліцы св. Пятра, пілігрымы маліліся падчас Эўхарыстыі разам з беларускімі біскупамі – Уладзімірам Гуляём і Андрэем Зноска. Пастыры з Беларусі бралі ўдзел ў фармацыйным курсе для новапасвячаных іерархаў, які праходзіў у гэтых днях у Рыме. Дзякуючы Божаму Провіду, беларускія пілігрымы ва ўспамін святога Мацвея, апостала і евангеліста, маглі маліцца ў Рыме разам з сучаснымі наступнікамі апосталаў – біскупамі Уладзімірам і Андрэем. Пасля заканчэння святой Імшы для ўдзельнікаў пілігрымкі была падрыхтавана экскурсія ў базыліцы святога Пятра, а потым яны мелі магчымасць пешшу прайсціся па вуліцах Рыма ад плошчы святога Пятра да Калізея. Затым пілігрымы скіраваліся ў Падую. 

Дзякуючы Божай дапамозе, усе ўдзельнікі пілігрымкі бяспечна вярнуліся на Радзіму і паехалі ў свае родныя мясціны, каб падзяліцца ўражаннямі са сваімі роднымі і знаёмымі.