Арцыбіскуп Тадэвуш Кандрусевіч на Божае Нараджэнне наведаў тры парафіі ў Брэсце

24-25 снежня

27 снежня, 2025
Фота: кс. Павел Эйсмант, Захар Кузьміч // Catholicminsk.by

У гэтым годзе арцыбіскуп эмэрыт цэлебраваў Імшу Пастэрку ў касцёле Узвышэння Святога Крыжа ў Брэсце, а на Урачыстасць Нараджэння Пана ўзначаліў ранішнюю Эўхарыстыю ў касцёле Маці Божай Каралевы і вячэрнюю ў касцёле святога Юзафа.

Яшчэ ў далёкім 1989 годзе арцыбіскуп Тадэвуш Кандрусевіч спрычыніўся да адкрыцця брэсцкага касцёла Узвышэння Святога Крыжа, дзе сёлета прайшла Пастэрка з удзелам іерарха, — і музей нанова стаў месцам сустрэчы чалавека з Богам.

На пачатку ўрачыстага набажэнства дзеці прадставілі сабраным сцэну Нараджэння Езуса.

У скіраванай да вернікаў гаміліі заслужаны іерарх падкрэсліў, што Нараджэнне Сына Божага ў Бэтлееме 2000 гадоў таму з’яўляецца паваротным пунктам у гісторыі чалавецтва. Бог Старога Запавету, далёкі і нябачны, суровы і караючы, стаў блізкім, прыйшоў з чалавечым сэрцам і тварам, каб быць доўгачаканым Эмануэлем — Богам з намі.

«Евангелле аб нараджэнні Езуса ў Бэтлееме — гэта цудоўны, Богам натхнёны мастацка-духоўны твор, які ўвесь хрысціянскі свет паўтарае з году ў год на свята Божага Нараджэння. Мы так часта чуем гэтую гісторыю, што прымаем яе як належнае. Але на самой справе яна распавядае пра тое, як Бог непасрэдна ўмяшаўся ў гісторыю чалавецтва. Для гэтага ён паслаў на зямлю Свайго Адзінароднага Сына. Святы апостал Ян кажа, што Бог так палюбіў свет, што аддаў Сына Свайго, каб пасхальнай таямніцай сваёй смерці і Уваскрасення Ён выбавіў нас з палону граху і вечнай смерці (пар. Ян 3,16)»,

— заахвоціў прысутных да разважання над таямніцай Уцелаўлення прамоўца.

Паводле іерарха, Езус, які нарадзіўся ў звычайнай пячоры сярод хатніх жывёл, найбольш прагне мець месца ў сэрцы чалавека.

«Збаўца прыйшоў да нас і мы павінны прыняць яго ў свае сэрцы, каб зразумець таямніцу Божай любові да чалавека і потым аддзячыць Богу за яе»,

— адзначыў важны аспект Урачыстасці цэлебрант.

Арцыпастыр са шкадаваннем адзначыў, што, на вялікі жаль, людзьмі часта кіруе не любоў да бліжняга, якая выплывае з любові да Бога, а любоў да саміх сябе. У свеце нарастаюць тэндэнцыі да эгаізму і геданізму, схільнасць быць першымі і заўважальнымі, чаму вельмі спрыяюць сацыяльныя сеткі.

«Цяпер у модзе штучны інтэлект. Людзі часта звяртаюцца да яго за дапамогай і кансультацыямі. Адзін чалавек спытаў штучны інтэлект: “Калі б я быў д’яблам, то што я павінен зрабіць, каб зняволіць людзей і кіраваць імі?”. Штучны інтэлект прапанаваў — у эру новых Інтэрнэт-тэхналогій і нястрымнага імкнення да спажывецтва — стварыць адмысловую культуру, у якой людзі стануць залежнымі ад хуткіх узнагародаў, лайкаў, забаўляльных мерапрыемстваў і забудуцца пра мэту свайго жыцця»,

— схіліў да развагаў з дапамогай яскравага прыклада дастойны іерарх.

Прамоўца адзначыў, што праявы мас-культуры трапляюць нават у месцы культу і асаблівай ласкі, чаму прыкладам з’яўляецца продаж цацкі-монстра лабубу на будслаўскім і іншых фэстах. Паводле іерарха, веруючы чалавек пакліканы быць незгасальнай зоркай на небасхіле Божага Валадарства, не ісці на непрымальныя кампрамісы і не паддавацца гандлю ідэаламі.

Іерарх канстатаваў, што ў хрысціянскай рэлігіі Хрыстус не можа быць аддзелены ад Яго Евангелля. Як спевака нельга аддзяліць ад песні, таксама і жыццё чалавека павінна быць аб’яднана з Евангеллем, якое вучыць любіць Бога і бліжняга.

«Няхай пасланне Божага Нараджэння натхніць нас любіць так, як любіць Бог, гэта азначае аддаючы сябе іншым і дапамагаючы ім у патрэбе, бо тады пазнаем Бога і задаволім голад любові ў нашых сэрцах, каб яны сталі Бэтлеемам нашага часу»,

— гэтым заклікам Тадэвуш Кандрусевіч завяршыў гамілію.

Напрыканцы набажэнства іерарх на розных мовах павіншаваў вернікаў з Божым Нараджэннем і наступаючым Новым 2026 годам, пажадаў ім ласкі нованароджанага Збаўцы на кожны дзень і падзяліўся з імі аплаткай.

У першы дзень святаў Божага Нараджэння арцыбіскуп Тадэвуш Кандрусевіч раніцай цэлебраваў Імшу ў касцёле Божай Маці Каралевы, а вечарам — у касцёле святога Юзафа ў Брэсце.

Дастойны іерарх нагадаў вернікам, як першы раз цэлебраваў Імшу ў касцёле Марыі Каралевы ў далёкім 1989 годзе, а ў 2016 годзе асвяціў касцёл святога Юзафа, таму, па ягоных словах, з вялікай радасцю моліцца ў гэтых святынях на свята Божага Нараджэння.

У гаміліі арцыпастыр адзначыў, што Уцелаўленне Сына Божага змяніла гісторыю свету, бо Бог увайшоў у яго ў чалавечай асобе, з чалавечым сэрцам і тварам.

«Таямніца Богаўцелаўлення з’яўляецца крыніцай нашай надзеі. Бог не застаўся ў недаступных нябёсах, але сышоў на зямлю, каб падзяліць наш лёс, стаць адным з нас і Богам з намі — Эмануэлем. Ён стаў чалавекам, каб мы маглі стаць Багамі ў духоўным сэнсе. Зрабіў гэта не з абавязку, бо Бог не вінен чалавеку нічога, акрамя любові. Кіруючыся любоўю, ён не пакінуў чалавека сам-насам з яго праблемамі. Ён не мог дазволіць, каб вяршыня яго тварэння — чалавек — быў асуджаны на ўсю вечнасць, таму паслаў свайго Сына ў свет як Збаўцу»,

— наблізіў тэалагічную сутнасць евангельскай падзеі іерарх.

Арцыпастыр нагадаў, што Нараджэнне Хрыста — гэта ажыццяўленне старажытнай надзеі. Стары Запавет быў доўгім падарожжам, якое рыхтавала чалавецтва да прыняцця Бога ў чалавечым целе. Тысячагоддзямі людзі жылі ў цёмным тунэлі, чакаючы Збаўцу. І Бог, верны Сваім абяцанням, не пакінуў Свайго стварэння — святло надзеі заззяла ў грахоўнай цемры.

Цэлебрант адзначыў таксама, што святло Хрыста праз нашае хрысціянскае сведчанне і жыццё павінна дасягнуць самых цёмных куткоў сучаснага свету, скажонага секулярызмам. Іерарх канстатаваў, што сучасны свет больш схільны да свецкіх, а не да духоўных спраў. Каляды ўсё больш становяцца камерцыйнымі, характарызуюцца закупамі і чэргамі ў супермаркетах, дзе можна знайсці ўсё, акрамя Хрыста. Але без Яго не будзе сапраўднага свята.

«Незалежна ад свецкіх тэндэнцый у пытаннях рэлігіі і святкавання Каляд, не боймася прыняць Езуса ў свае сэрцы! Ён нічога не забірае, а толькі дае неабходную для збаўлення Божую ласку, каб нашыя сэрцы сталі Бэтлеемам нашага часу»,

— заклікаў арцыпастыр.

Гамілію арцыбіскуп Тадэвуш Кандрусевіч завяршыў пажаданнямі, каб Божае Нараджэнне было не толькі прыгожай традыцыяй, але і момантам асабістай сустрэчы са Збаўцам, які з’яўляецца адзінай і сапраўднай надзеяй. Каб, як пілігрымы надзеі, вернікі маглі ісці з Ім у новае заўтра, сагрэтыя радасцю нараджэння Збаўцы.