Арцыбіскуп Станеўскі ў Барысаве ўзначаліў парафіяльную ўрачыстасць і ўдзяліў кандыдатам сакрамэнт хрысціянскай сталасці
- 16 верасня, 2024
- Тэкст: Бажэна Міклашэвіч, фота: Данііл Маскевіч // Catholicminsk.by
8 верасня ў парафіі Нараджэння Найсвяцейшай Панны Марыі ў Барысаве адбылася адпустовая ўрачыстасць тытулу мясцовага касцёла.
Адметнай рысай сёлетняга святкавання была прысутнасць арцыбіскупа Юзафа Станеўскага, Мітрапаліта Мінска-Магілёўскага. Мітрапаліт прыбыў, каб раздзяліць з прысутнымі радасць супольнага святкавання, а перад усім каб 24-м адпаведна падрыхтаваным кандыдатам удзяліць сакрамэнт канфірмацыі.
На пачатку Эўхарыстыі кандыдаты прывіталі арцыбіскупа словамі: “Нашыя жыцці – гэта жыцці простых людзей, але мы імкнемся жыць так, каб годна насіць імя хрысціяніна. Мы прагнем, каб Хрыстус займаў годнае месца ў кожнай нашай сям’і і ў сэрцы кожнага парафіяніна”.
У гаміліі пастыр Мінска-Магілёўскай архідыяцэзіі падкрэсліў, што тыя, хто прыме сакрамэнт хрысціянскай сталасці, асабліва моладзь, павінны будуць у далейшым як дарослыя людзі і сапраўдныя хрысціяне бараніць сваю веру, а перад усім жыць паводле гэтай веры. Іерарх заклікаў кандыдатаў да канфірмацыі несці годнае сведчанне аб Хрысце ў іх асяроддзі.
На заканчэнне святой Імшы канфірмаваныя выказалі ўдзячнасць арцыбіскупу Юзафу за ўдзяленне сакрамэнту канфірмацыі і прасілі аб малітве, каб, узмоцненыя Духам Святым, яны вытрывалі на шляху веры і паклікання.
