«Наша прызначэнне – неба»: у Дзераўным адзначылі Унебаўзяцце Найсвяцейшай Панны Марыі і 25-годдзе святарскага пасвячэння ксяндза Віталя Гальца

15 жніўня

21 жніўня, 2026
Тэкст: Марыя Новікава / Фота: Віктар Ведзень // Catholicminsk.by

Свята Унебаўзяцця Найсвяцейшай Панны Марыі вёска Дзераўное адзначыла яшчэ і 25-годдзем святарскага пасвячэння мясцовага ўраджэнца ксёндза Віталя Гальца. Юбілей святара, даўняя традыцыя асвячэння кветак і ўрачыстая працэсія з Найсвяцейшым Сакрамэнтам зрабілі гэты дзень духоўнай падзеяй для ўсёй парафіі.

15 жніўня на Унебаўзяцце Найсвяцейшай Панны Марыі ў Дзераўным адбылася ўрачыстая Імша з нагоды 25-гадовага юбілею святарскага пасвячэння ксяндза Віталя Гальца. Пробашч дзераўнянскай парафіі ксёндз Міхал Бубен у вітальным слове падкрэсліў, што гэтая парафія даў Беларусі не аднаго святара. Гэта сведчыць аб шчырасці малітваў людзей, якія на працягу 400 гадоў узносяцца да Бога ў святыні, што ад самага асвячэння ніколі не закрываўся.

«Сёння ўсе парафіяне дзякуюць вам за вашае служэнне, і мы вельмі цешымся, што вы змаглі падзяліць гэты асабісты шчаслівы момант з парафіянамі»,

— дадаў душпастыр.

Цэлебраваў святую Імшу сам шаноўны юбіляр, які ў гаміліі з асаблівай цеплынёй звярнуўся да землякоў-парафіян.

Святар нагадаў пра безумоўную важнасць супольнай сямейнай малітвы, а таксама звярнуў увагу на ролю Маці Божай у нашым жыцці: Яна сваім прыкладам пакоры і любові паказвае нам дарогу да неба.

«Наша прызначэнне – неба»,

— падкрэсліў ксёндз Віталь.

У віншаваннях аднавяскоўцаў гучала сардэчная надзея, што наступныя 25 гадоў стануць плённым часам у жыцці ксяндза Віталя і прынясуць багатыя духоўныя плады для ўмацавання веры людзей, да якіх ён пасланы.

Яшчэ глыбей перажыць радасць гэтага дня дапамагаў вернікам узнёслы спеў літургічнага хора мінскага касцёла святых Сымона і Алены «Голас душы».

Напрыканцы набажэнства паводле старадаўняй традыцыі адбылося асвячэнне кветак, зёлак, садавіны і гародніны, якія парафіяне прынеслі з сабой.

Кветкі і зёлкі сімвалізуюць духоўную прыгажосць, чысціню і паўнату ласкі Найсвяцейшай Панны Марыі. Вернікі іх захоўваюць за абразамі, выкарыстоўваюць для гатавання лекавай гарбаты альбо як знак Божай абароны дому і жывёлы ад стыхійных бедстваў і іншых няшчасцяў.

Пасля гэтага адбылася Эўхарыстычная працэсія вакол святыні з благаслаўленнем прысутных Найсвяцейшым Сакрамэнтам. Таксама кожны, хто прыйшоў на свята, атрымаў ад ксяндза Віталя асабістае благаслаўленне.

Адным з кранальных момантаў свята стала парафіяльная падзяка юбіляру. Парафіяне паднеслі ксяндзу Віталю памятны торт з надпісам, якім выказалі сваю ўдзячнасць за шматгадовае душпастырскае служэнне. Гэты просты, але сімвалічны жэст стаў знакам той шчырай сувязі, якая злучае святара з яго парафіяй.