3акрыццё юбілейнага года адбылося ў галоўным касцёле Мінска
- 1 студзеня, 2026
- Фота: з архіва парафіі // Catholicminsk.by
30 снежня ў мінскім архікатэдральным касцёле Імя Найсвяцейшай Панны Марыі, які на працягу года быў адной з трох юбілейных святыняў Мінска-Магілёўскай архідыяцэзіі, адбылося ўрачыстае закрыццё Юбілейнага года.
Нагадаем, што з 29 снежня 2024 года па 30 снежня 2025 года, гэта значыць, ад дня, у які прыпала свята Святой Сям’і: Езуса, Марыі і Юзафа, вернікі маглі штодзённа атрымліваць поўны адпуст за наведванне гэтага касцёла і ўдзел у святой Імшы і іншых набажэнствах у ім.
Святую Імшу з нагоды завяршэння Юбілейнага года ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
Падчас Эўхарыстыі было прачытана Пастырскае слова Мітрапаліта Мінска-Магілёўскага арцыбіскупа Юзафа Станеўскага на свята Святой Сям’і.
