Дарагія святары, законнікі і законніцы, катэхеты, шаноўныя настаўнікі, выхавацелі і, асабліва, вы, дарагія навучэнцы, студэнты і бацькі!
Шчыра віншую вас з гэтым асаблівым днём — 1 верасня, — Днём ведаў, — калі перад намі адчыняюцца дзверы новага 2026/2027 навучальнага і катэхетычнага года.
Пачатак навучальнага года — цудоўны дар ад Бога, новы этап шляху, на якім Пан заклікае нас узрастаць не толькі ў ведах, але і ў веры, мудрасці ды любові да бліжняга.
Божае слова нагадвае нам: «Пачатак мудрасці — валодай мудрасцю і набывай разважлівасць ва ўсякай тваёй маёмасці» (Прып 4, 7). Няхай гэтае прагненне сапраўднага святла ведаў і веры накіроўвае кожнага з вас да сапраўднай крыніцы мудрасці, якой ёсць Бог.
Звяртаючыся да вас, дарагія дзеці і моладзь, хачу нагадаць: вучоба ў школе і катэхеза ў парафіі — гэта не проста абавязак, а захапляльнае падарожжа ў краіну ведаў.
Няхай кожны ўрок, кожная лекцыя і кожная сустрэча на катэхезе набліжаюць вас да пазнання Праўды, якою з’яўляецца сам Хрыстус. Не бойцеся цяжкасцяў, будзьце мужнымі, адкрытымі на дабро і вернымі хрысціянскім каштоўнасцям.
Шаноўныя педагогі, катэхеты і бацькі! Ваша місія — вялікая і адказная праца. Вы пакліканыя не толькі пераказваць веды, але і сведчыць пра жывую веру, сеяць у сэрцах дзяцей насенне любові, надзеі і міласэрнасці. Жадаю вам бязмежнага цярпення, мудрасці, душэўнага спакою і Божай радасці ад вашага служэння.
Давяраю ўсіх вас матчынай апецы Найсвяцейшай Панны Марыі. Няхай Дух Святы напаўняе вашыя сэрцы святлом, натхненнем і руплівасцю ў пазнанні Бога і свету.
Благаслаўляю вас на плённы, мірны і шчаслівы навучальны і катэхетычны год.
З пастырскім благаслаўленнем і малітваю,
✠ Арцыбіскуп Юзаф Станеўскі
Мітрапаліт Мінска-Магілёўскі
