Вернікі з Фаніпаля наведалі каралеўскі горад над Нёманам
- 28 кастрычніка, 2024
- Паводле Dvasercy.by
У суботу, 26 кастрычніка, адбылася чарговая пілігрымка з удзелам фаніпальскіх парафіян.
Вернікі разам з ксяндзом пробашчам Дзянісам Шастаковічам MSF накіраваліся на захад Беларусі. Мэтай пілігрымкі стаў горад Гродна, багаты гістарычнымі помнікамі і славутасцямі.
Кульмінацыяй паездкі стала Святая Імша ў Фарным касцёле, падчас якой адбыўся Інгрэс (урачысты ўваход у катэдральную базыліку) новага біскупа гродзенскага Уладзіміра Гуляя. Гэтай падзеяй афіцыйна распачалося яго служэнне ў якасці кіраўніка дыяцэзіі. Пілігрымы далучыліся да супольнай малітвы, у якой удзельнічалі шматлікія прадстаўнікі духавенства, а таксама вернікі з розных куткоў Гродзеншчыны і Беларусі ў цэлым.
Пасля святой Імшы, падмацаваныя эўхарыстычным пасілкам, парафіяне наведалі гродзенскія касцёлы Маці Божай Анельскай, Звеставання Найсвяцейшай Панны Марыі, Адшукання Святога Крыжа, а таксама мелі час для самастойнага азнаямлення з атмасферай Гродна.
