Вернікі парафіі св. Антонія ў Магілёве наведалі Гродна

Група падарожнічала цягніком, які спалучае два гарады: Магілёў і Гродна.

Першым пунктам наведвання была св. Імша ў катэдральнай базыліцы св. Францішка Ксаверыя, якую гродзенцы здаўна называюць “фарным касцёлам”. Пілігрымы атрымалі магчымасць памаліцца каля цудадзейнага абраза Маці Божай Кангрэгацкай (Студэнцкай), які знаходзіцца ў базыліцы.

Далей у праграме падарожжа значыўся пабрыгіцкі касцёл Звеставання Найсвяцейшай Панны Марыі, які з’яўляецца адным з нешматлікіх у Беларусі рэктаральных касцёлаў, г. зн. пры якіх няма парафіі. Ксёндз-канонік Антоній Грэмза, рэктар касцёла, правёў пазнавальную экскурсію па святыні і яе сутарэннях.

Затым магілёўцы адправіліся ў Гродзенскую Вышэйшую Духоўную Семінарыю, каб паглядзець, дзе навучаюцца будучыя беларускія святары. Семінарыя змяшчаецца ў будынку старадаўняга пабернардынскага кляштара, прыбудаванага да пабернардынскага касцёла Узвышэння Святога Крыжа. Вернікі на хвілінку затрымаліся на малітву ў гэтым найстарэйшым захаваным гродзенскім касцёле.

Перайшоўшы па мосце праз Нёман, пілігрымы памаліліся ў касцёле айцоў-францішканаў пад тытулам Маці Божай Анёльскай. Менавіта там стагоддзе таму служыў і выдаваў часопіс “Рыцар Беззаганнай” св. Максіміліян Марыя Кольбе, мучанік Другой сусветнай вайны.

Вярнуўшыся ў цэнтр горада, вернікі наведалі Стары і Новы замкі. Са спісу святыняў яны “залічылі” яшчэ Гродзенскую харальную сінагогу, старадаўнюю Каложскую і больш новую Пакроўскую царкву.

І вось пілігрымка падышла да свайго завяршэння. А яе ўдзельнікі, поўныя уражанняў, гэтым жа цягніком вярнуліся ў свой родны горад Магілёў.