У Мінску прайшоў Крыжовы для міністрантаў

12 сакавіка

13 сакавіка, 2026
Тэкст: кс. Аляксандр Шыманскі / Фота: удзельнікі мерапрыемства // Catholicminsk.by

12 сакавіка ў мінскім архікатэдральным касцёле Імя Найсвяцейшай Панны Марыі адбыўся Крыжовы шлях з удзелам міністрантаў горада Мінска.

Перад ім адбылася цэлебрацыя святой Імшы, якую ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.

У сваей гаміліі іерарх звярнуў увагу на тое, што традыцыя Крыжовага шляху мае глыбокі духоўна-маральны фундамент, і менавіта дзякуючы ёй мы асаблівым чынам разумеем ахвяру Езуса Хрыста на Крыжы.

Пасля святой Імшы адбыўся сам Крыжовы шлях, які правялі непасрэдна міністранты.

У стацыях маладыя хлопцы разважалі над праявай бясконцай любові Сына Божага да чалавецтва.

Вернікі асаблівым чынам маліліся за будучых лектараў, якія ў канцы красавіка з рук арцыбіскупа Юзафа Станеўскага, Мітрапаліта Мінска-Магілёўскага, атрымаюць благаслаўленне на гэтую паслугу, каб яны плённа і самаадднана служылі Каталіцкаму Касцёлу.

Напрыканцы малітоўнага спаткання прадстаўнікі літургічнай службы алтара змаглі пазнаёміцца з гісторыяй архікатэдральнага касцёла.

Гісторыя мінскай архікатэдры — гэта гісторыя Мінска-Магілеўскай архідыяцэзіі, таму маладым хлопцам было вельмі цікава, яны задавалі свае пытанні, на якія атрымлівалі адказы.

Кожнае месца у касцёле, кожны надпіс маюць не толькі вялікае літургічнае, але і духоўнае значэнне, таму ўсім людзям карысна гэта ведаць, а асабліва тым, хто выконвае ў ім пэўныя функцыі.