У Мінску адбылася агульная катэхеза для моладзі з удзелам арцыбіскупа Іньяцыё Чэффаліа

5 лютага

7 лютага, 2026
Тэкст: Ірэна Ахрамовіч / Фота: Анастасія Кавалёнак // Catholicminsk.by

5 лютага ў архікатэдральным касцёле Імя Найсвяцейшай Панны Марыі ў Мінску адбылася агульная катэхеза для моладзі, якую правёў Апостальскі нунцый у Беларусі арцыбіскуп Іньяцыё Чэффаліа на тэму: «Не дастасоўвайцеся да ментальнасці гэтага свету…» (пар. Рым 12, 2).

Гэта сустрэча стала заключнай з серыі агульных катэхез для моладзі. Яна распачалася святой Імшой, у якой маглі ўзяць удзел усе ахвотныя. Пасля Эўхарыстыі моладзь сабралася ў дольным касцёле мінскай архікатэдры, дзе каля 80 юнакоў і дзяўчат сустрэліся з прадстаўніком Святога Айца ў нашай краіне.

Пасля уступнай малітвы арцыбіскуп Іньяцыё падзякаваў за запрашэнне і шчыра прывітаў моладзь, падкрэсліваючы, што прыйшоў не з гатовымі адказамі, а з жаданнем ісці поруч і разам слухаць Божае слова.

Ён нагадаў, што жывая вера — гэта не дастасоўванне да шаблонаў, але гатоўнасць слухаць, шукаць сэнс і дазваляць сябе здзіўляць.

Цэнтральнай тэмай разважання стаў заклік святога Паўла не прытрымлівацца мыслення гэтага свету. Нунцый растлумачыў, што гэта заахвочванне не да ўцёкаў ад свету, а да яго пераўтварэння.

«Хрысціянін — гэта не проста “добры грамадзянін” свету… Ён пакліканы быць іншым — не аддзяляцца, а служыць; не асуджаць, але сведчыць», — адзначыў іерарх.

Ён пацвердзіў, што вопыт мучанікаў беларускай зямлі надае гэтаму слова асаблівую вагу. Сведчанне веры тут — гэта жывая гісторыя мужчын і жанчын, якія выбралі Хрыста, змагаючыся любоўю і малітвай.

Працягам думкі арцыпастыра сталі словы Хрыста: «Вы — соль зямлі» і «Вы — святло свету» (пар. Мц 5, 13-14). Ён падкрэсліў, што Хрыстус не кажа «вы павінны быць», але «вы ёсць».

«Соль захоўвае, ачышчае, надае смак. Святло асвятляе, накіроўвае, сагравае. Так і хрысціянін не змешваецца са светам, а перамяняе яго»,

— растлумачыў нунцый.

Ён заклікаў моладзь не замыкацца ў камфорце і не баяцца думаць шырока, марыць пра больш братэрскае грамадства. Гэта, на яго думку, і ёсць спосаб распазнаваць «добрую, прыемную і дасканалую» Божую волю (пар. Рым 12, 2).

Асаблівую ўвагу прадстаўнік Святога Айца надаў тэме супольнасці і сінадальнасці. Ён нагадаў, што абнаўленне розуму, пра якое піша апостал Павел, мае супольны характар. «Гаворка не пра тое, каб змяняцца дзеля моды, але каб дазволіць Духу перамяняць нас, адкрываючыся на слуханне, дыялог, суадказнасць», — сказаў арцыбіскуп Чэффаліа Ён параіў маладым людзям выхоўваць гэты сінадальны стыль у парафіяльным, сямейным і грамадскім жыцці, пераадольваючы страх перад навізной Духа.

У завяршэнне сваёй прамовы Апостальскі нунцый прапанаваў моладзі пачаць з простых і шчырых жэстаў:

больш уважлівага слухання бліжняга,
слова падтрымкі,
вернай асабістай малітвы,
актыўнага ўдзелу ў жыцці супольнасці.

Ён заклікаў кожнага штодня спытаць сябе, ці кіруецца яго жыццё логікай Евангелля або мысленнем свету. Гэтыя канкрэтныя крокі ёсць шляхам да сінадальнасці, якая нараджаецца з паўсядзённай вернасці ў малым.

Моладзь шчыра падзякавала арцыбіскупу Іньяцыё Чэффаліа за натхняльнае слова, прысутнасць і добры настрой. Таксама словы падзякі прагучалі ў адрас брата Вадзіма Войціка OFMCap за пераклад прамовы і прысутнага мансеньёра Крыштафа Сэрокі, сакратара Апостальскай нунцыятуры ў Мінску. Да сустрэчы далучыўся арцыбіскуп Юзаф Станеўскі.