Сцежкай любові: дабрачынны кірмаш ў касцёлах Мар’інай Горкі і Рудзенска

Больш за дзесяць гадоў парафія святога Антонія ў Мар’інай Горцы супрацоўнічае з дзяржаўнай установай «Пухавіцкі сацыяльны пансіянат “Сямейны ачаг”».  Кожны год дзеці і моладзь парафіі прыязджаюць павіншаваць і пачаставаць цукеркамі людзей, якія там пражываюць, са святам Божага Нараджэння і Новым годам.  У актавай зале пансіяната падчас святочнага канцэрта заўсёды аншлаг.

А сёлета парафіяне касцёлаў Мар’інай Горкі і Рудзенска зладзілі ў Пальмовую нядзелю дабрачынны кірмаш.   

Парафіяне і госці з задавальненнем набывалі прыгожа аздобленыя вербачкі, сурвэткі для яек і кулічоў, гліняны посуд, сподкі з папяровай лазы, упрыгожванні і вяночкі,  кошычкі і кубкі, зробленыя ўмелымі рукамі жыхароў установы «Сямейны ачаг».

Атрыманыя падчас дабрачыннай акцыі сродкі ў суме 618 рублёў перададзены у пансіянат.