Адбыліся рэкалекцыі Каталіцкага мужчынскага руху “Воіны Марыі”

Падчас сустрэчы ў Мінску мужчыны ўдзельнічалі ў Эўхарыстыі, супольных малітвах і канферэнцыях, якія прамаўляў іх духоўны кіраўнік айцец Віктар Мялешка OFMConv. Гэтыя дні былі часам адыходу ад шуму штодзённасці і малітоўнай сустрэчы з Богам і Багародзіцай.

Дэвізам духоўнай сустрэчы з’яўляліся словы “Deus Caritas Est” (“Бог ёсць любоў”). Удзельнікі сустрэчы выслухалі катэхезы пра сыноўства як шлях да сапраўднага бацькоўства, а таксама аб прабачэнні і ахвяры пакуты. Важным элементам сустрэчы было разважанне над Божым словам.

Апроч духоўных практыкаванняў, мужчын, якія прыбылі на рэкалекцыі з розных куткоў Беларусі, чакаў актыўны адпачынак і супольныя размовы.

“Гэты марыйны рух з’явіўся ў Каталіцкім Касцёле і для Каталіцкага Касцёла”.

Ён аб’ядноўвае выключна мужчын, якія прысвяцілі або жадаюць прысвяціць сваё жыццё Маці Божай. Каб быць Воінам Марыі, трэба прайсці тры гады фармацыі, цалкам даверыць сябе Марыі і выбраць Яе сваім жыццёвым правадыром.

Мэта руху — выхаванне маладых мужчын, якія, згодна з пакліканнем, атрыманым ад Бога, па прыкладзе Беззаганна Зачатай Марыі, імкнуцца быць вернымі сведкамі Хрыста, а праз заступніцтва святога Юзафа стараюцца быць добрымі мужамі і бацькамі, якія выконваюць сваю місію ў Касцёле і ў грамадстве.

Хто такі Воін Марыі?

Гэта мужчына, які:

• прайшоў фармацыю ў адпаведнасці з патрабаваннямі Кодэкса Воіна, падчас рэгіянальных і агульнабеларускіх сустрэч, арганізаваных Воінамі Марыі,
• прайшоў братэрскую размову, пасля якой быў дапушчаны да пасвячэння,
• прыступіў да пасвячэння, якое адбываецца напрыканцы фармацыйнага года,
• працягвае фармацыю ў супольнасці ў адпаведнасці з патрабаваннямі Кодэкса.

Адкуль назва Воін Марыі?

• Воін змагаецца за сваё сужэнства,
• Воін змагаецца за сваю жонку,
• Воін змагаецца за сваіх дзяцей,
• Воін змагаецца за сваю сям’ю,

З чым змагаецца Воін Марыі?

• Воін Марыі змагаецца з уласным грахом,
• Ніколі не змагаецца з чалавекам.

Пры напісанні артыкула была выкарыстана інфармацыя каталіцкага інфармацыйнага парталу Catholic.by.