Арцыбіскуп Кандрусевіч ва ўрачыстасць Усіх Святых: «Бог ацэньвае нас па іншай шкале, чым людзі»

1 лістапада

3 лістапада, 2025
Фота: з архіва парафіі ў Адэльску // Catholicminsk.by

Урачастасць Усіх Святых і ўспамін Усіх памерлых вернікаў арцыбіскуп эмэрыт Тадэвуш Кандрусевіч традыцыйна адзначыў у сваёй роднай парафіі Унебаўзяцця Найсвяцейшай Панны Марыі ў Адэльску (Гродзенская дыяцэзія, дэканат Гродна-Захад).

Раніцай 1 лістапада дастойны іерарх узначаліў святую Імшу ў гонар Усіх Святых. Разам з ім прысутнічаў пробашч парафіі, ксёндз канонік Віктар Мыслюк, канцлер курыі Гродзенскай дыяцэзіі ксёндз канонік Аляксандр Мацкевіч і сакратар іерарха ксёндз Павел Эйсмант.

У прамоўленай гаміліі арцыпастыр падкрэсліў, што ўрачыстасць Усіх Святых дае магчымасць ушанаваць вядомых, а таксама не вядомых нам, але вядомых Богу, святых. «Можна сказаць — недацэненых герояў», — растлумачыў ён. Гэтая ўрачыстасць паказвае, што Бог заўважае змаганні ўсіх людзей на шляху да святасці.

Імшальныя чытанні, якія Касцёл прапануе на гэты дзень, заўважыў іерарх, нагадваюць аб тым, што Божая любоў распаўсюджваецца на кожнага чалавека. Гэта азначае, што ўсе людзі пакліканыя да святасці і ніхто не выключаны з магчымасці атрымаць вечную ўзнагароду.

«Святыя ўтвараюць трыўмфуючы Касцёл. Яны бачаць Бога, які ёсць любоўю, тварам у твар. Чысцовыя душы ўтвараюць церпячы Касцёл, але адначасова спазнаюць Божую любоў, бо ведаюць, што пасля ачышчэння ўвойдуць у радасць неба. Жывыя ўтвараюць пілігрымуючы і змагаючыся Касцёл. Яны таксама спазнаюць любоў Бога, Які піша гісторыю»,

— навучаў арцыпастыр.

У Евангеллі Езус прадстаўляе перад слухачамі восем благаслаўленняў. Паводле сцвяржэння арцыпастыра, яны з’яўляюцца крытэрыямі святасці і даюць вернікам надзею.

«Урачыстасць Усіх Святых вучыць, што Бог ацэньвае нас па іншай шкале, чым людзі, якія часта не заўважаюць нашых змаганняў за жыццё ў Божай ласцы. У Бога іншая калькуляцыя, і мы знаходзімся на Яго “плацёжцы”, якой ёсць радасць вечнага шчасця»,

— падкрэсліў прамоўца.

Напрыканцы гаміліі арцыбіскуп заахвоціў прысутных браць прыклад са святых, даверыцца Божай любові і жыць паводле васьмі благаслаўленняў Хрыста, якія з’яўляюцца ўказальнікамі шляху да неба.