Маленькія шчырыя сэрцы і вялікія каштоўнасці: святкаванне Дня дзіцяці ў Гудагаі з арцыбіскупам Тадэвушам Кандрусевічам

1 чэрвеня

2 чэрвеня, 2026
Фота: кс. Павел Эйсмант // Catholicminsk.by

1 чэрвеня, калі Каталіцкі Касцёл успамінае святога Юстына, мучаніка, у Міжнародны дзень абароны дзяцей, у дыяцэзіяльным санктуарыі ў Гудагаі з удзелам арцыбіскупа эмэрыта Тадэвуша Кандрусевіча адзначаўся Дзень дзіцяці Астравецкага дэканату Гродзенскай дыяцэзіі.

На арганізаванае мясцовай парафіяй Адведзінаў Найсвяцейшай Панны Марыі мерапрыемства прыехала каля 80 дзяцей.

У гаміліі арцыбіскуп цёпла прывітаў дзяцей, павіншаваў іх з паспяховым завяршэннем навучальнага года і пажадаў добрага адпачынку падчас летніх канікул. Пры гэтым ён нагадаў ім, што няма канікул ад малітвы. Кожны свой дзень трэба ёю распачынаць і завяршаць, у нядзелю і святы прымаць удзел у святой Імшы.

Ён таксама заклікаў іх удзельнічаць у традыцыйнай пастырскай праграме «Канікулы з Богам», падчас якой дзеці не толькі адпачываюць, але таксама пазнаюць і паглыбляюць рэлігійныя веды.

Вяртаючыся да справы Дня абароны дзяцей, арцыпастыр нагадаў, што ў наш час шматлікіх пагрозаў дзеці патрабуюць асаблівай апекі і абароны, у тым ліку і духоўнай, каб не трапіць у пастку злога духа і духоўна моцнымі падрыхтавацца да дарослага жыцця.

Арцыбіскуп Тадэвуш падкрэсліў, што Астравеччына вядома не толькі сваёй атамнай электрастанцыяй, але і гудагайскім санктуарыем Божай Маці.

Калі першая забяспечвае нас электрычнай энергіяй, то санктуарый — духоўнай. Яго дзверы адчынены для ўсіх. Яго наведваюць шматлікія пілігрымы, асабліва падчас штогадовага традыцыйнага гудагайскага фэсту.

Пілігрымы прыходзяць сюды не толькі, каб дзівіцца незвычайна прыгожай прыродзе, але каб маліцца перад цудадзейным абразом Маці Божай, на стацыях Крыжовага шляху і таямніцах святога Ружанца. Яны ідуць сюды, каб «падладаваць» свае духоўныя акумулятары.

Такімі пілігрымамі таксама з’яўляюцца дзеці. Езус кажа: «Дазвольце дзецям прыходзіць да Мяне». І дзеці прыбылі ў гудагайскі санктуарый, дзе Марыя вядзеі іх да Езуса.

«Пазнаўшы Хрыста, Яго трэба несці іншым. Гэта азначае, што мы ўсе, у тым ліку і дзеці, павінны быць місіянерамі. Гісторыя Касцёла, таксама і ў нашай краіне, ведае шмат прыкладаў, калі дзеці прыводзяць сваіх бацькоў або аднагодкаў да веры»,

— сказаў іерарх.

Езус любіць дзяцей і ставіць іх у прыклад старэйшым. Дзеці адрозніваюцца сваёй нявіннасцю і шчырасцю. Іх любоў не карыслівая, а адданая. Менавіта таму Езус вучыць, што, калі мы не станемся як дзеці, то не ўвойдзем у Божае Валадарства. Нездарма выслоўе кажа, што неба можна ўбачыць у вачах дзяцей.

«Чалавек не можа памаладзець і вярнуць гады дзяцінства ці маладосці, але нават у старасці можа заставацца маладым духам. А гэта адбудзецца тады, калі ён жыве згодна з Божым законам і духам Евангелля. Езус, нягледзячы на тое, што жыў 2000 гадоў таму, надалей застаецца маладым сваім вучэннем. І мы таксама павінны жыць духоўнай маладосцю Хрыста»,

— падсумаваў іерарх.

Напрыканцы гаміліі арцыбіскуп Тадэвуш заклікаў дзяцей прасіць апекі Божай Маці Гудагайскай, быць моцнымі ў веры і несці радасць хрысціянства ў свае сем’і, школы і месцы адпачынку, каб праз іх сведчанне свет пазнаў Хрыста і жыў праўдай Евангелля, якая дапаможа быць шчаслівымі ў гэтым жыцці і прывядзе ў радасць вечнага жыцця ў небе.

Напрыканцы Імшы дзеці з вялікай радасцю сталі на супольнае фота з арцыбіскупам. Затым некаторыя з іх прынялі кармэліцкі шкаплер — знак адданасці Богу праз заступніцтва Марыі. Усіх жа дзяцей пасля духоўнай чакала «вясёлая» частка — гульні, арганізаваныя парафіянамі, і смачны стол.