Ад Мінска да Капыля: як валанцёры Caritas аб’ядналіся, каб падарыць цяпло і адкрыць для сябе гісторыю

31 студзеня

2 лютага, 2026
Тэкст: Ірына Фаміна // Фота: Алеся Гедроіц, Вольга Мышкоўская // Catholicminsk.by

31 студзеня валанцёры парафіяльных суполак Caritas з Мінска і Капыля здзейснілі сапраўднае падарожжа міласэрнасці і сяброўства. Гэты дзень стаў яскравым прыкладам таго, як аб’яднанне намаганняў двух парафій можа прынесці багаты плён і пакінуць глыбокі след у сэрцах многіх людзей.

Галоўнай мэтай паездкі стала наведванне Калінаўскага сацыяльнага пансіяната «Ветлівы» у Капыльскім раёне. Падрыхтоўка да гэтай падзеі пачалася задоўга да самога візіту. Валанцёры з мінскай архікатэдральнай парафіі Імя Найсвяцейшай Панны Марыі праводзілі ў сваім касцёле акцыю па збору сродкаў асабістай гігіены. Парафіяне шчыра адгукнуліся на просьбу і перадалі шмат неабходнай дапамогі для пастаяльцаў пансіяната. Адначасова з гэтым валанцёры з Мінска і Капыля старанна планавалі праграму сустрэчы, у якой у выніку было задзейнічана больш за дваццаць чалавек.

Вынікам сумеснай працы стала неверагодна цёплае і насычанае свята. Для жыхароў пансіяната валанцёры зладзілі вялікую канцэртную праграму: гучалі вершы і песні, кранальныя мелодыі цымбалаў і скрыпкі, не абышлося без танцаў, вясёлых музычных конкурсаў і нават невялікай тэатральнай пастаноўкі.

Але самым кранальным момантам стала ўручэнне памятных сувеніраў. Кожны пастаялец атрымаў у падарунак маленькага анёлка, зробленага рукамі валанцёраў, а таксама пернік з самым важным напамінам: «Бог любіць Цябе!».

Пасля канцэрта быў час на самае каштоўнае — асабістыя размовы і знаёмства. Атмасфера была настолькі шчырай, што ніхто не застаўся без усмешкі і добрага настрою. Расчуленыя жыхары пансіяната сардэчна дзякавалі валанцёрам і прасілі наведваць іх часцей.

Аднак на гэтым падарожжа не скончылася. Пасля пансіяната валанцёры накіраваліся ў касцёл святых апосталаў Пятра і Паўла ў Капылі, дзе прынялі ўдзел у святой Імшы. Эўхарыстыю ў інтэнцыі ўсіх валанцёраў цэлебраваў пробашч парафіі ксёндз Андрэй Калядка, што стала для іх вялікім духоўным умацаваннем.

Каб яшчэ бліжэй пазнаёміцца, капыльскія валанцёры запрасілі мінчан на экскурсію ў Капыльскі раённы краязнаўчы музей. Гэта стала для ўсіх сапраўдным адкрыццём: госці з Мінска з захапленнем даведаліся пра багатую гісторыю горада і, у прыватнасці, пра тое, што менавіта на гэтых землях нарадзіўся фундатар мінскага Чырвонага касцёла Эдвард Вайніловіч.

Насычаная праграма дня пакінула глыбокі след у сэрцы кожнага ўдзельніка. Валанцёры вярталіся дадому не стомленыя, а напоўненыя радасцю, новымі ідэямі і планамі на будучыню.

Гэты дзень стаў яскравым сведчаннем таго, што супрацоўніцтва і сяброўства паміж парафіямі не толькі памнажае добрыя справы, але і духоўна ўзбагачае саміх валанцёраў.