Skip to main content

У Мінску з удзелам біскупа Юрыя Касабуцкага прайшла аплаткавая сустрэча ўдзельнікаў руху «Легіён Марыі»

27 снежня
  • 29 снежня, 2025
  • Тэкст і фота: Ганна Бычынская // Catholicminsk.by

27 снежня ў архікатэдральным касцёле Імя Найсвяцейшага Панны Марыі ў Мінску прайшла аплаткавая сустрэча ўдзельнікаў руху «Легіён Марыі».

Рух «Легіён Марыі» дзейнічае ў Касцёле на Беларусі ўжо 30 гадоў. Яго дзейнасць заснавана на шанаванні Панны Марыі. Яна апякунка «Легіёна» і пасярэдніца паміж ім і Богам. Праз Яе на людзей сыходзіць Божая ласка. Як і святы апостал і евангеліст Ян, легіянеры маюць магчымасць праводзіць апостальства пад няспыннай апекай і кіраўніцтвам Панны Марыі.

У святой Імшы, якую цэлебраваў Генеральны вікарый Мінска-Магілёўскай архідыяцэзіі біскуп Юрый Касабуцкі, таксама прынялі ўдзел духоўны кіраўнік «Легіёна Марыі» айцец Юрый Находка OCD, дырэктар Катэхетычнага аддзела Мінска-Магілёўскай архідыяцэзіі ксёндз Юзаф Сярпейка, настаяцель супольнасці кармэлітаў босых у Мінску айцец Сяргей Трысцень OCD.

Звяртаючыся да вернікаў у гаміліі, біскуп Юрый Касабуцкі адзначыў:

«Бог даў нам магчымасць сабрацца сёння, напоўніцца Божым Духам, сілай і ісці далей, прапаведаваць Яго ў тых асяроддзях, да якіх Бог пасылае нас. Таму ў час Божага Нараджэння гэтая малітва і Эўхарыстыя, якая здзяйсняецца ў вашых інтэнцыях, няхай напоўніць тымі дарамі, якія нам патрэбны. Каб мы неслі Божае слова тым людзям, да якіх Бог нас накіроўвае».

Пасля святой Імшы ў дольным касцёле біскуп паблагаславіў аплаткі. Святары і легіянеры дзяліліся сваімі радасцю і дабрынёй, святочным настроем, выказвалі свае віншаванні і пажаданні, размаўлялі, дзяліліся навінамі з парафій, вынікамі сваёй апостальскай працы, а таксама фатаграфаваліся. Сапраўдная сям’я Божых дзяцей — дружная, вясёлая і шчырая. І гэтай сям’і біскуп Юрый пажадаў на будучае:

«Моцнага здароўя, фізічнага і духоўнага, моцы Божай, радасці і супакою ў сэрцы, таго супакою, які, прыслухаўшыся, пачулі пастушкі ў спевах анёлаў: “Хвала на вышынях Богу, а на зямлі супакой людзям добрай волі”».
, , , , ,
На хатнюю старонку
Навіны