Біскуп Юрый Касабуцкі прыняў удзел у пасяджэнні Кансультатыўнай міжканфесійнай рады ў Іўі

1 снежня

11 снежня, 2025
Фота: ivyenews.by
Паводле Grodnensis.by

11 снежня ў Іўі прайшло пасяджэнне Кансультатыўнай міжканфесійнай рады на чале з Упаўнаважаным па справах рэлігій і нацыянальнасцяў Аляксандрам Румакам. У пасяджэнні ўдзельнічаў Генеральны вікарый Мінска-Магілёўскай архідыяцэзіі Юрый Касабуцкі.

Як паведамляе ivyenews.by, пасяджэнне пачалося са знаёмства ўдзельнікаў з іўеўскай мячэццю, гісторыю якой прадставіў старшыня Мусульманскага рэлігійнага аб’яднання ў Беларусі муфцій Абу-Бекір Шабановіч.

Біскуп Юрый Касабуцкі распавёў аб тым, як развіваецца духоўны цэнтр беларускіх католікаў — Нацыянальны санктуарый Маці Божай Будслаўскай.

Таксама ў межах пасяджэння ўдзельнікі азнаёміліся з экспазіцыяй Іўеўскага музея нацыянальных культур «Пад адзіным небам праз стагоддзі», дзе знаходзяцца матэрыялы і прадметы культурнай, этнічнай, канфесійнай і лакальнай спадчыны рэгіёну і ўсяго свету, усклалі кветкі да памятнага знака ў гонар землякоў, якія загінулі ў гады Вялікай Айчыннай вайны, наведалі памятны знак «У гонар сяброўства і згоды канфесій Іўеўшчыны», азнаёміліся з выставай мугіраў як матэрыяльнай спадчыны мусульман Беларусі.

Упаўнаважаны па справах рэлігій і нацыянальнасцяў адзначыў на пасяджэнні, што «Беларусь з’яўляецца шматнацыянальнай і шматканфесійнай краінай».

«Мы аб гэтым гаворым усюды, што на нашай зямлі знайшлі свой родны дом людзі розных нацыянальнасцяў. А стварэнне духоўных цэнтраў — гэта адказ выклікам часу. Пад уздзеяннем інфармацыйных тэхналогій змяняецца структура самога грамадства, размываюцца нацыянальныя межы, дзякуючы інтэрнэту ствараецца новая віртуальная рэальнасць са сваімі правіламі і нормамі паводзінаў. Таму пытанні духоўнасці набываюць асаблівае значэнне»,

— сказаў Аляксандр Румак.

Упаўнаважаны дадаў, што для беларусаў норма, калі мусульмане і іўдзеі, праваслаўныя і католікі жывуць побач, а ў цэнтры горада стаіць помнік, які аб’ядноўвае іх.

«Мы адкрытыя і гасцінныя. Але наша задача — гэта захаваць. А новыя духоўныя цэнтры толькі ўмацуюць беларусаў у веры, незалежна ад веравызнання», — сказаў ён.