У Росі пройдуць рэкалекцыі руху «Сужэнскія сустрэчы»

Да ўдзелу запрашаюцца сем’і і духоўныя асобы з Гродна, Гродзенскай дыяцэзіі і ўсёй Беларусі. Колькасць месцаў абмежаваная, таму не варта адкладаць запіс.

Сэнс і мэта рэкалекцый

Праграма, якая ўжо больш за 20 гадоў дапамагае сужонкам па ўсёй краіне, накіраваная на пераадоленне крызісаў, аднаўленне эмацыйнай блізкасці, цеплыні, даверу і паглыбленне ўзаемаразумення ў сям’і, з дзецьмі і з іншымі людзьмі.

Для духоўных асоб падрыхтавана асобная праграма, якая адкрывае прастору для глыбейшага дыялогу з Богам і людзьмі.

Каму асабліва варта ўдзельнічаць:

• сем’ям, якія перажываюць складаны перыяд, пэўны крызіс і шукаюць шлях аднаўлення адносін;
• сужонкам з добрымі адносінамі, што жадаюць іх развіваць і ўмацоўваць;
• маладым сем’ям, якія толькі пачынаюць сумесны шлях і хочуць закласці моцны падмурак будучыні;
• духоўным асобам, якія імкнуцца аднавіць і паглыбіць сувязь з Богам і людзьмі.

Важныя пытанні, якія будуць закранутыя:

• Як распрацаваць асабісты план для паляпшэння, аднаўлення і ўмацавання адносін у сваёй сям’і?
• Якія першыя крокі зрабіць менавіта ў вашай жыццёвай сітуацыі?

Што даюць рэкалекцыі?

Рэкалекцыі «Сужэнскіх сустрэч» па ўнікальнай праграме даюць магчымасць не толькі стварыць асабісты план аднаўлення адносін, але і пачаць яго рэалізацыю ўжо падчас рэкалекцый.

Дыялог стане ключавым інструментам, які будзе дапамагаць ствараць больш цеплыні, узаемнай павагі, узаемаразумення і радасці быцця разам.

Сведчанні ўдзельнікаў:

• «За гады сужэнства мы амаль не мелі часу адзін для аднаго: дзеці, клопаты, бясконцыя справы… Пачатак быў вельмі няпросты, і паступова паміж намі з’явілася адлегласць, нейкая халоднасць. І раптам гэтыя рэкалекцыі прыйшлі менавіта тады, калі мы найбольш у гэтым мелі патрэбу. Тут мы шмат што перагледзелі, перапрацавалі, нібы зноў адкрылі адзін аднаго. Едзем дадому з жаданнем далей клапаціцца пра нашы адносіны і з канкрэтнымі крокамі, якія ўжо намецілі для сябе».
  
•  «Я вяртаюся з рэкалекцый з глыбокім пачуццём радасці і еднасці паміж намі. Мы нібыта асцярожна прыбралі з адносін усё лішняе, што назапашвалася гадамі. І разам з гэтай лёгкасцю я вязу з сабой канкрэтнае рашэнне змяніць многае ў сваіх паводзінах, бо яшчэ мацней адчуў: гэта мае вялікі сэнс і каштоўнасць для нашага сужэнства».
  
• «У нас назапасілася шмат нявырашаных тэм і ўзаемных непаразуменняў. Раней, калі мы спрабавалі іх абмяркоўваць, кожны ўпарта стаяў на сваім, упэўнены ў сваёй праўдзе, і размова не вяла да прымірэння. Пасля гэтай сустрэчы мы інакш паглядзелі на дыялог і зразумелі, як слухаць і чуць адно аднаго. Цяпер мы ўжо бачым, як па-новаму можна падыходзіць да нашых складаных пытанняў, і адчуваем першыя плады гэтага — больш спакою, разумення і надзеі ў нашых адносінах».

Арганізацыйныя ўмовы

Рэкалекцыі распачынаюцца ў пятніцу 6 сакавіка ў 18.00 і заканчваюцца ў нядзелю 8 сакавіка каля 15.00.

Запрашаюцца ўсе, хто гатовы працаваць над сваімі сужэнскімі адносінамі, незалежна ад узросту, канфесійнай прыналежнасці і рэлігійнай актыўнасці: і тыя, хто толькі распісаліся ў ЗАГСе, і тыя, хто жыве ў касцёльным шлюбе.

 Адрас: Гродзенская вобл., Ваўкавыскі р-н, г/п Рось, вул. Чырвонаармейская, 12. Рэкалекцыйны дом «Голас Айца».

 Запіс :

Тэлефон / Viber / Telegram: +375 (29) 652-11-44

— заклікаюць арганізатары.

Сем’і, якія ўдзельнічалі ў рэкалекцыях «Сужэнскіх сустрэч», дзеляцца на партале catholic.by сваімі сведчаннямі:

• «Ад стомленасці да еднасці». Гісторыя сям’і Жукоў.
• «Мы пазбеглі шматлікіх памылак у далейшым жыцці». Гісторыя сям’і Сідлярэвічаў.
• «Каштоўны падарунак, які падзяліў жыццё на “да“ і “пасля”». Гісторыя сям’і Высоцкіх.