«Юбілеі — каштоўныя моманты для падвядзення вынікаў нашага жыцця — як асобных людзей, так і супольнасцяў. Яны таксама з’яўляюцца нагодай для разважання і слухання таго, што кажа нам сёння Святы Дух», — так Папа Францішак напісаў напярэдадні распачацця Юбілею 2025-годдзя хрысціянства.
Адказваючы на заклік Пантыфіка, ксяндзы хрыстусоўцы, якія служаць у сталічнай парафіі святога Яна Евангеліста і святога Максімільяна Марыі Кольбэ, запрашаюць у Юбілейным 2025 годзе далучыцца і глыбей увайсці ў своеасаблівы спосаб малітвы, якім ёсць lectio divina, падтрымліваючы малітоўную ініцыятыву “Дні цішыні для Мінска”. Гэта будуць для ўдзельнікаў ініцыятывы 2 дні (субота і нядзеля), калі яны ў поўнай цішыні схіляцца над Божым Словам. У сённяшнім гучным і хуткім свеце, згодна з інтэнцыяй арганізатараў, гэтая ініцыятыва павінна стаць нібы аазісам, абароненым ад штодзённага стрэсу, дзе малітва стане падсілкаваннем хрысціянскага жыцця веры, надзеі і любові.
Прыняць удзел можа кожны дарослы хрысціянін.
Для ўдзелу ў малітоўнай ініцыятыве ў студзені неабходна запісацца па спасылцы ТУТ>>>.
Арганізатары прапануюць для ўдзелу наступныя даты:
- 18-19 студзеня,
- 22-23 лютага,
- 22-23 сакавіка.
Ксяндзы хрыстусоўцы спадзяюцца, што ўдзел у гэтай малітоўнай ініцыятыве стане часам, “каб даведацца, як маліцца і, перш за ўсё, як выхоўваць нас, сучасных людзей, у малітве ў эпоху лічбавай культуры”.
Рэкамендаванае ахвяраванне за ўдзел – 80 руб.
Колькасць месцаў абмежаваная.
Месца правядзення: Хрысціянскі сацыяльны цэнтр (Мінск, вул. Серафімовіча, 19, каля ст. м. Пралетарская).
Тэлефон для даведак: +375 (33) 605-41-67 (кс. Андрэй Лысы SChr).
Раней “Дні цішыні для Мінска” адбываліся тройчы – у верасні, кастрычніку і лістападзе 2024 года.
