Адкрыта рэгістрацыя на чацвёртую Майстэрню літургічнага спеву

З 13 па 15 сакавіка

25 лютага, 2026
Тэкст: Павел Бранавец / Фота: з архіва Майстэрні літургічнага спеву, Марыям Джавад // Catholicminsk.by

З 13 па 15 сакавіка 2026 года пры кляштары айцоў францішканаў канвентуальных у Івянцы пройдзе чацвёртая Майстэрня літургічнага спеву — сустрэча касцёльных музыкантаў і аматараў літургічнай музыкі, якія жадаюць удасканаліць сваё служэнне падчас літургіі і паглыбіць яе перажыванне.

Інфармацыя пра магчымасць удзелу ў чацвёртай Майстэрні літургічнага спеву, ці так званай «міні-майстэрні», з’явілася на мінулым тыдні ў афіцыйных сацыяльных сетках Музычнай майстэрні.

«Калі вы хацелі перажыць нешта глыбокае і прыгожае падчас Вялікага посту і чакалі знак — вось ён»,

— заахвочваюць арганізатары.

Сустрэча пройдзе з 13 па 15 сакавіка ў Івянцы (Валожынскі дэканат, Мінска-Магілёўская архідыяцэзія) пры францішканскім кляштары святога Антонія Падуанскага.

Па сваёй задуме Майстэрня літургічнага спеву ўяўляе сабой цыкл фармацыйных сустрэч для кантараў, удзельнікаў касцёльных хораў і ўсіх тых, хто праз спеў адкрывае прыгажосць і глыбіню літургіі, які прапануе магчымасць удасканаліць музычныя навыкі і літургічныя веды, узбагаціцца духоўна і быць у жывым кантакце з аднадумцамі.

«Праграма “міні-майстэрні” вельмі насычаная і прадугледжвае перадусім вакальна-харавыя рэпетыцыі і штодзённы ўдзел у святой Імшы. Падчас сустрэчы пройдзе таксама духоўная канферэнцыя, кантарскі майстар-клас і адарацыя. Запланаваны і супольны вольны час», —паведамляюць арганізатары.

Рэгістрацыя ўдзельнікаў сустрэчы адкрыта да 6 сакавіка.

Форма анлайн-заяўкі даступная па спасылцы ТУТ>>>

Умовы ўдзелу:

Да ўдзелу запрашаюць ахвотных ва ўзросце ад 16 гадоў. Заяўкі ад людзей малодшага ўзросту будуць аўтаматычна ануляваныя.

У сувязі з абмежаванай колькасцю месцаў удзел магчымы выключна пасля папярэдняй анлайн-рэгістрацыі і атрымання пацвярджэння з боку арганізатараў (на электронную пошту).

Даезд да месца правядзення мерапрыемства і зваротную дарогу ўдзельнікі арганізуюць самастойна. Пажадана прыехаць у пятніцу 13 сакавіка да 19.30, у іншых выпадках неабходна скантактавацца з арганізатарамі (электронная пошта: muzmajsternia@yandex.by; Instagram: @muzmajsternia);

Ад’езд можна планаваць у нядзелю 15 сакавіка пасля 14.00. У выпадку, калі разглядаецца даезд і ад’езд на грамадскім транспарце (маршрутцы), рэкамендавана паклапаціцца пра яго браніраванне загадзя, найлепш — адразу пасля атрымання пацвярджэння аб удзеле.